أنا بدوي وبعيشتي ما تنعمت ...

السلام عليكم ورحمة الله وبركاته
قصيدة للشاعر:محمد فياض الحويطي

الصمت حكمه في مواقف تبي صمت
والصمت في بعض المواقف مذله
وانا بعـد ياصاحبي يوم ساهمت
ماأقول شي الا يكون بمحله
أمشي على وضح النقا ما توهمت
والتايه اللي ما لقى من يدله
البادي اظلم وانت بادي وهاجـمت
ودك تغير مسلك الناس كله
انا بدوي وبعيشتي ما تنعمت
رمز الرجوله سيف والكيف دله
أعيش في صحرى الضما ما تألمت
وأقنص سباع البر في كل تله
محبوبتي صحراي في حبها همت
أعشــق سهلها والرجوم المطله
يكفي إني من البداوه تعلمت
إن الخضوع لغير ربي مذله
وان شانت الديره على النوق حملت
وانزل بروض من اول امزان عله
تلقى الخزاما والنفل فيه لاحمت
والقحويان يفيض حسنه ودله"
حنا البدو ياللي علينا تهجمت
حنا هل التاريخ والمجد كله
حنا البدو، حنا عرب مابنا شمت
أصل ونسـب محنا فروع وقله
نضل اعظم منك مهما تعاظمت
أنت الذنب والراس حنا هلـن له
وان كان لك يمنى طويله بها اقدمت
يمنـــاك واليسـرى ترانا نشله
وللعلم خذها كانك ما تعلمت
اللغز حنا لك بغينا نحله
سيـــف لنا انت بحقه تكلمت
في مامضـى جدك ركع تحت ظله