مرثية

ياناس عيني ساهرة مابها نوم
والفكر متشتت ولي قلب منصاب
والحظ طاح ومااعتقد لحظة يقوم
ماعاد فيني صبر وشعور واعصاب
ياماتجرعت الشقا قلت مقسوم
مير الزمن كشر عليه بالانياب
حتم عليه اعيش تغلبني اهموم
حتى السعادة بيني وبينها حجاب
عيش الصفا ليته معي مرة يدوم
غصبا عن عيون العواذل والاجناب
لكن عمري بالشقا صار محكوم
باصبر وهمي صار للنفس غلاب
واليا تذكرت الخوي قلت مرحوم
والله يفتح له من الجنة ابواب
يسكن بها خالد وله قصر معلوم
يجني من الاثمار مالذ اوطاب
يقضي العمر مسرور راضي ومخدوم
في جنة الفردوس في طول الاحقاب
ويحقق الامال وابليس مرجوم
يغفر ذنوبه رب غافر وتواب
ساعة وصلني علمه اصبحت مصدوم
وان غاب ذكره حي حاضر وماغاب
ماني على غيره من الناس ملزوم
مالي ابد غيره من العالم احباب
لايمكن انسى صورته سيد القوم
اغلى بشر بين المعارف والاصحاب
اللي وصفني بالوفا بشعر منظوم
يعجبك مضمونه وله سحر جذاب
اليوم انا من عشرته صرت محروم
بكيت حتى خاطري في الحزن ذاب
ادعي عسى الله يرفق بقلب مهموم
يجعل له من الحزن مخرج ومجناب
غاب القمر عني ولاتغني انجوم
ماتلفت انظاري ولاتكسب اعجاب
اصبحت اشوف الكون فعيوني اغيوم
والدمع هليته من العين سكاب