لكن ولكن ما يجي بعدها خير

أعزائي الكرام...
أسعد الله أوقاتكم بكل خير..
عودة لكم بعد انقطاع بهذه القصيدة التي كتبتها تصويراً لمقناصي في جبال الوصال..
آمل أن تلقى القبول والاستحسان..

[poem=font="traditional arabic,6,blue,normal,normal" bkcolor="transparent" bkimage="" border="double,4,blue" type=1 line=0 align=center use=ex num="0,black""]
مغباش عاصي ما يوالي التواخير = لو رام عين الشمس فزّ ونهبها
البال صافي والنسايم تباشير = والنيه أجمل والخفوق انتخبها
شديت عزماً ما طرى منه تغيير = والشمس في سجة وغافي هدبها
معي الرجال اهل الوجيه المسافير = الخوة اللي يا هني من كسبها
"ابو جنى" و"فيصل" مع "ابو المناصير" = روس الرجال اللي تعلّى نسبها
و"ابو سليمان" الذي قوله يصير = والذيب "مفتن" كل طالة اعتصبها
"بشراع" وانس يسعر الأرض تسعير = قطَّب عصيات الدروب وغصبها
ستة سرندل تعزف احلى المزامير = واربع نِمَر غنّت لها من طربها
من طنخته من غير جُنحان بيطير = واذا السحايب تشتكي من شَعَبها
يوماً وقفنا به على لُزَّة البير = حيَّت بنا روس الشواهق بادبها
الساعة خمسة والبنادق مشاهير = والخير في هاك الموابر طلبها
سرنا وغنّت في الغصون العصافير = وغرازنا من روحها ومن سكبها
والما جيوش تفجر الصخر تفجير = من شافها يروى وهو ما قربها
الديرة اللي ما عفس خيرها الكير = هاك الوصال اللي تواصل سببها
لكن...و"لكن" ما يجي بعدها خير = ديرة تغالط كل حاسب حسبها
قلنا بساعة ينتهي عاجل السير = لكن وينك من نهاية رُتَبها
الديرة اللي الساعة فيها كما الطير = طارت ولا شفنا بها الا تعبها
طحنا بهُشَمْ مثل العُقَدْ للمناشير = نجَّارها يبطي وهو ما غلبها
رقَّاتها تقطع مدى سُبَّق العير = من ويلها تسمع صياح لعصبها
والشمس شبَّت في الحنايا قطامير = واصبح يغيش الما ف كبدي لهبها
فيها الظما سلطان جاير ولا يجير = متولع بضيم النفوس وعطبها
واللي نجا منها تلقى المعاصير = أرواز غير النجم لا ما عقبها
لكنّ للخالق ف خلقه تدابير = يَسَّر لنُزال العسيرة كُربها
نقب الجمال اللي كما دكّ جنزير = رحرح حيازمها ومهّد صَعَبها
ما باقي الا مثل كذب الأساطير = عفَّت وعاف الدهر منهو كتبها
والصبر زاح وما بقي غير تصبير = حتى وصلنا به عوالي سُحبها[/poem]

وسلامتكم