قصيدة / مستور بن طميران الى ابنه مع الرد.

السلام عليكم ورحمة الله وبركاته حبيت اشارك بقصيده ارسلها والدي الي, طبعاً مع الرد مني : إليكم الابيات :.

هذي ابيات الوالد مستور بن طميران المطرفي ويقول :

ابطيت عني بالمغيبه يابو ذعار
والفكر كاثرتاً عليه الهمومي
الوقت داهمني وانا اصالي النار
وقلبي من الرجفه تقول امحمومي
ارضي واضيق وكل ساعه على شار
واكثر سببها من عبيد البقومي
عجل وابى منكم تفاصيل الاخبار
اما دفاع اصير ولا هجومي
ماني جزوع انا على الوقت صبار
لو كان يدحمنا الزمان الدحومي
الرجل مالله خالقه خلقة الثار
يبعد عن الواد الخمر فالرجومي
والصقر ميقاعه على رؤؤس الاوكار
والا الحباري فالخباري تحومي
والطير لولاله جناحين ماطار
لاهو بلاميت ومزري يقومي
جربت فالدنيا ملذات وامرار
واخير منها ماتكون امخدومي

وسلامتكم.

وهذا الردي مني لوالدي العزيز:

يامرحبا في مرحبا سبق الانظار
فرحة هطول الغيث بعد السمومي
ارتاح لاتذكر هواجيس وافكار
إشارتاً نفهم جميع العلومي
جعلك بجنه تحتها تجري انهار
وترجع شباب العمر باحلى رسومي
اللي زرع بالطيب يحصد له اثمار
وحنا ثمرك اليوم بالطيب دومي
بنيت صلب الساس ماهو بمخشار
وانتجت من صلبه ثلاثة قرومي
لك عندنا شيمه وقيمه مقدار
وجنبك معك وقت الرخاء واللزومي
طيبك يعم البيت والضيف والجار
وفيك الثلاث البيض محداً يلومي
نقشتلك حكمه على صلب الاحجار
بحراً غميق ويغرق اللي يعومي
واختامها صلو عدد وبل الامطار
على النبي عداد برق الوسومي

وسلامتكم واسف على الاطاله .