"أنا معك"

السلام عليكم ورحمة الله وبركاته

قصيدة آمل أن ترتقى لذائقتكم.



شفت السحاب اللي ظلاله تغشاك
............ هذاك شوقي والمواعيد ديمه

شفت الطيور اللي مع الجو تنصاك
............ مرسال شوقي والمخاطر جسيمه

شفت الفياض اللي تباهى بحلياك
............ منها على خدك رموز ووسيمه

هذاك حظي لا ابتسم ثم حيّاك
............ فاضت رياضه من تعاليل غيمه

كن الرعود اللي تدندن فلقياك
............ دقات قلبي والمفارق ظليمه

يوم العبير اللي يذعذع بذكراك
............ يسري لطيفك مع هبايب نسيمه

حتى الغصون اللي تمايل لطرياك
............ فيها رسايل من هناك ونعيمه

تطرب من اسمك والتناهيد تنخاك
............ تنبض لشوفك والملاقى غنيمة

انا معك ظلك وعينك ويمناك
............ انا معك عقلي وروحي مقيمه

انا معك وان غبت وابطيت مسلاك
............ انا معك عد البحور العظيمة

انا معك وارجيك واعشقك واهواك
............ انا معك في الوصل مرضى الهزيمه

انا معك بعداد ما حل طرياك
............ انا معك ما دام في الناس شيمه

وسلامتكم ،،،