شاركونا بأجمل الأبيات

على ذكرى المواجع و السفر و الحل و الترحال *** طويت آخر ورق في دفتر أحزاني
طويته و أنكسر قلبي و صوتي بالمواجع سال *** و دريت إن الظلام اللي تحت كف السهر جاني
جلست أجمع مسافاتي و أغني للسفر موال ***على صفحة من الماضي بها حلمي و عنواني
بها كم سافرت عيني ليالي و الظلام أهوال *** و بها كم سافرت روحي و أنا بالليل وحداني
حبيبي ليلة البارح مشيت من الغرام أميال *** و أناظر رحلة الذكرى هدب عينك يغطيني
حبيبي كل ما أشوفك تجي بالذاكرة تختال *** نهر من فايض الذكرى يجي من داخل أشجاني
تخيل يوم عانقني خيالك خاطري وش قال *** تخيل قبل أسولف لك نشدني عنك وجداني
نشدني لين خلاني مدينة هزها زلزال *** تخيل ما هدى حتى لقاك بوسط شرياني
أروح لسدرة الموعد معاي لموعدك مرسال *** و أخاف إنك تجي قبلي و ترحل قبل تلقاني
هنا كانت ليالينا "الغلا" و المقبلات "آمال" *** و هنا كانت مواعيدك مطر تخضر به أغصاني
هنا كانت نواظرنا سوالف في كلام أطفال *** و هنا كانت عصافيرك على دربي تحراني
هنا شف باقي آثارك على رمل الوعد ما زال *** وهنا شف دمعة طاحت من عيونك على شاني
حبيبي لا تنشدني عن أوضاعي و كيف الحال *** أنا بعدك سحاب أبيض أضم الريح بأحضاني
غلاك بدلة الذكرى بهار و هاجسي فنجال*** تقهواه الجروح اللي بها ذكراك تنصاني
تسافر بي و أحسب إني وصلت آخر وطن بالبال *** و اثرني ما وصلت إلا بداية درب حرماني
و تبقى سيرة الذكرى قصيدة تكتب الترحال *** سوالف للعيون اللي صداها دمعة أحزاني