فكرة برج المليون رد .............!!!

وضح القصائد




وضح القصايد.! لامتى وانتن رقاد..؟
شاب السكوت .. وخّوة الصمت صلفه


لعـلّ مايقـدح علـى كفّـي زنــاد
لاسقيتكـن بعـد الضمـا ذلّ وطفـه


لاوالله الا توّ مابانت ( سعـاد ) . !!
وتو الهوى مـاوّرد (زهيـر) حتفـه


قالت من انت..؟ وقلت يابنت الاجواد
انا القويّ اللـي قتـل فيـك ضعفـه


وانا السهير اللـي تعـداك .. نشّـاد
يطرد نهـار ويلهـث الصبـح خلفـه


نجمه يغيـب وضيعتـه فيـك تـزداد
ولااشعل سراجه يصرخ الليل.! طفّـه


سجين هـم ولابـس.. ثيـاب جـلاد
نصفه ذبيح .. وذابح المـوت نصفـه


تلميذ مهمل يشرح الدرس ل استاد ..
بليد . ! واذكى مـن تلاميـذ صفـه


وانا الموقع جرحي ادناه .. من غـاد
الشاعر اللي طّـوع الشعـر حرفـه


اصعب حروفي لاركب راسـه عنـاد
يلّـذ لـي لاعسعـس الليـل عسفـه


اعـزف لموتـه اغنية..عيـد ميـلاد
واسمع صدى صوت النغم قبل عزفـه


بالصدر طفل يسحـب خطـاه بركـاد
وبالعجز ريح يرعب الكـون عصفـه


لي صدفة احلى مـن الفيـن ميعـاد
ولي موعد احلى مـن الفيـن صدفـه


وبالناس لي انصاف واقران واضـداد
وكـل يفسرنـي علـى قـد عرفـه


وبي جرح ماله غير نزفه له ضمـاد
وشلون اطيب..؟؟ ولابعد كّف نزفـه


واللي بعث هود ل(ارم ذات الاعماد)
انا بزمن يشبـه زمـن عـاد وصفـه


أصدق من الدمعه على خّـد.. بغـداد
واكذب من اللي شافها وغض طرفـه


غربه. وهم. حيره. ألم. هم. واجهـاد
طالت وضاقـت نسـأل الله لطفـه..


ويابنت انا.. طارق مثل طارق زيـاد
لولا الذي قضبّنـي الجمـر كفّـه.!!


والله يلولا. خاطـر عيـون الاوغـاد
ل اقطف لك اللـي ماتمنيـت قطفـه


خالد الردادي