والنشاما قطّعوها

سلمان الندوي
مرحبا بالصاحب اللـي صحبتـه ماهـي جديـده = من زمان العام يـوم النـاس تسقـي بالسوانـي
صورتك قبل امس حطوها على ظهر الجريده = والنشـامـا قطّـعـوهـا يـافــلان ابـــن الـفـلانـي

( صح لسانك ياسلمان بدعة شاعر تضمنت كامل مقومات شعر المحاوره
في بيتك الاول اوضحت خصوصية المحاوره وانك تريد شخص معين
بدون ان تذكر اسمه وابدعت في رسم المعنى بحرفنه
في البيت الثاني للامانه بيتين قمه )

الباسل
البقا يالصاحب اللي ماتوخر في ( الوعيده ) = جاء على ( وعده ) على حسب (الدقايق والثواني )
النشامي يفهون الشعر وابيات القصيده = كنت احسبه في اول الاوقات واحد من خواني

( ابو خالد والله مانت سهل هههههههههه اسلم اسلم في بيتك الاول ابدعت في نقض
مافتله سلمان شعراً وفكرتاً وكشفت الاوراق
وبيتك الثاني رد متقن على بيت سلمان هههههههه الله يبيض وجهك
ورسالتك في البيت وصلت على العنوان )


سلمان الندوي
البعير اللي سلاح الموت ناشب في وريده = ما يلد العين في الاقصى (عيونه في المداني )
النشاما دوبهم حطوا على دربك مكيده = وانت ما تدري وقلبك يدّرج بين الحواني

الباسل
البعير انحمله ونرجعه يرجع لسيده = منعرف وسم الجمل هو سحالي والا ( يماني )
انا قلبي من صخر ياخوكـ وعيوني حديده = ماحسبت احساب للعذال لان الله عطاني

سلمان الندوي
شاعر المليون سجوا فيه (مستوره وعيده ) = وانت يامجنون دوّر لك معك مجنون ثاني
مادحاً نفسه نعرفه وانت ياهذا الوليده = عارفاً علتك وعلاجك على راس اللساني

الباسل
احنا في موضوع وانته جايب علوماً بعيده = لا تجيب علوماً ( لعيده وتاصل للسناني )
الرساله جات لك تحمل معانيها العديده = انتبه والا ترااك تروح ياهالمودماني

سلمان الندوي
السناني لو يذم البنك كنسلنا رصيده = ( ياحصان القوم لاتصهل وتومي بالاذاني )
حكمة الله فيك والخلاّق يفعل مايريده = الطبايع ما تغيّر وانت غيرك الزماني

الباسل
انتبه علمك هذاك الاولي حذرا تعيده = ( احفظ السبع الوصايا واحفظ السبع المثاني )
صاحبي سلمان شاعر فحل والله انه يزيده = ( يحبك بيوت الشعر ويغوص في جوف المعاني )

للامانه قاف محسوب وابدعتم والله العضيم وقاف محسوب بدون ادنا شك
واتمنى ان تقبلو تعليقي على بيتين البدعه وردها بصدر رحب
وقد اكون اصبت وقد اكون اخطأت ولاكن من اعجابي باالمحاوره
احببت ان يكون لي هذا التعليق
بيض الله وجيهكم وصحت الالسن
تقديري واحترامي لكما