إهداء إلى الشاعر شباب

هذا ردك ياعبدالرحمن انا مضهر معي بعد قصيدة شباب


دام البقا وانا اتشرف عقب جيت
في مجالس اصحاب القلوب النقيه

دعوة رفيقن غالين جيت لبيت
لا شك من حقه وواجب عليه

نعم الرفيق اللي بهالوقت خاويت
هذاك ابو نادر ونادر سميه

ولا انت يا شباب كفيت وفيت
تاقف مواقيفك بصبح وعشيه

شاعر على سلوم المراجل تربيت
من نسل قومن من قديمن وفيّه

هذيل وإليا قيل لي هذيل فزيت
قوم الفصاحه بالمراجل ثريه

من سابق الازمان وهْيَ لها صيت
من عهد أبو القاسم وصحبه سخيه

رجالهم ياقف بعسر المواقيت
وصغارهم عز السند والحميه

وانا سلايل حرب بالشعر ما احصيت
فعول ربعي بالمزايا غنيه

اسمن على مسمى جبالن ثوابيت
مثل الرعد لا من سمعنا دويه

من دون ربعي مرخص الروح ما اقفيت
ما دام لي من حر الازمان فيّه

ياغالين ما شفت زوله وحبيت
وشلون لو يدك تصافح يديه

يومك تمد الطيب بالطيب مديت
واكبر فخر عرف النفوس الر ضيه

تدمح لك الزلات لا منّك اخطيت
تفرح على افراحك وصافين نيه

ما دام تاليها قبور وتوابيت
نبغى نعيش العمر كله سويه

وارجو السموحه كان في ردي أبطيت
حدتني ظروف الزمان القويه

من طيب معدن جيتني ثم حييت
ببيوت جزله والمعاني طريه

وابشرك بدلال ربعك تقهويت
جادوا عليه بالكرم والعطيه

تسلم يمينك واتشرف عقب جيت
في مجالس اصحاب القلوب النقيه


وسلامتك ..


ياسلام ياسلام عليكم مبدعين صحت السنتكم انت وشباب

بيض الله وجيهكم امتعتونا طول الله اعماركم

تحياتي وتقديري لكم