قبيلة هذيل البقوم

عندي سؤال بسيط أود الإجابه والتوضيح عليه ؟!

س1/ هل قبيلة هذيل البقوم يرجع نسبهم في قبيلة هذيل الحجاز المعروفه ،،،لماذا يقال لهم هذيلي وليس هذلي ،،،مثل مانسمع عندنا اليوم ولماذا الفرق ؟!!






دام الجميع بخير

ايه من هذيل الحجاز يعني عيال عمنا ,والهذلي والهذيلي مابينها فرق ,اتمنى اني
وضحت الصوره لك.

شاكره لك حسن التوضيح والإجاز اخوي فارس

والله ونعم بعيال عمنا لحاف جنبنا هذيل البقوووووووووووووووووم




دمت بود

الأخت جوهرة هذيل الهذيلي والهذلي كلها لغة صحيحة وفصيحة وتستعمل ولكن
الأشهر الهذلي بحذف الياء يقول المسعودي رحمه الله
انته توصيني نسيت اني هذيل من هذيل....الناس اميزها واخاطبها بقد عقولها
ويقول خلاف بن هذال لصياف رحمه الله
ترى الهذيلي طينه صلبة ومن طينة هذيل...وليا كبس له خزنتةِ ماينفتح صندوقها
يقصد بالهذيلي الهذلي لأنه في لغة اهل نجد الهذيلي وكان طلق بن صويلح الهذلي يطلقون عليه الشعار والجمهور والمؤلفين عن الادب الشعبي طلق بن صويلح الهذيلي رحمه الله

انا من جهتي وحسب معلوماتي الشخصية وحسب ماسمعت عن عيال عمنا البقوم جميع؟؟


ان هناك جدل بين هذيل البقوم وباقي قبايل البقوم

السبب ان الهذيلي من البقوم يكتب في كل شؤؤن حياته سواء عمل او مدرسة ........... الخ

يكتب الاسم فلان بن فلان الهذيلي

فدار جدل حسب هذه القضية

لماذا لاتكتبون الهذيلي البقوم؟؟؟

فقالو: نحن لسنا بقوم نحن هذيل((الهذيلي))

اي انهم يقصدون ان الهذيلي غير البقمي غير الهذلي


ولكن البقوم لم يرضون بهذه المعاندة ومصرين على انهم بقوم


ويسكن هذيل البقوم في منطقة تسمى((شعر)) ((بكسر الشين))


تبعد عن تربة مسافة قصيرة جداا




وشكرا

سمعت بيتين تقول

انا المرزوقي وجدي عرهب 000 وباقي البقوم إلفويه

الا الهذيلي اجنبي صادق 000 لكن مضيناه بالجمبيه


ينقل الموضوع الى القسم المناسب

الاخ /فواز الهذلي
من قال لك هذا الكلام قد كذب البقوم يعرفون ان هذيل البقوم حلفاء
لهم وهم بقوم بالحلف ولايقولون الا الهذيلي وهذيل يكتبون الهذيلي
البقمي ولا ينكرون انتسابهم للبقوم بالحلف
يقول شامان الهذيلي البقمي وهو اشهر رجل يجيد القصائد الحربية
ناشدِ عنا ترانا هذيل
مثل صقرِ في المواكر مغنه
وانشد اللي عارفِ جدنا
من حربنا يصطبر بالغليل
ويل من سو المنايا دعنه
الفنا والقل ماردنا
ويقول كذلك في مناخ البهيرة
مزنةِ خيلت في الليل...ثعولها جالها ربان
انتهض عقب جوك هذيل..حربةِ تلطم العربان
ويقول دخيل الله بن عويشز
اليا اعتزينا بعزوتنا الهذيليه...كم سابقِ باللقا نرجل براعيها
ويقول ماجد العاكور
لاد الهذيلي مزبنة الجلاويه...اخاذة الطايلة في كل الاحوالي
كم واحدِ طلقوا عذراه في الهيه...من غير صم الرمك شهبات الاذيالي
ويقول صنيدح الهمرق
ياسابقي صفراَ عليها البواكير ...معصوصبة مثل الجمل في الهدادي
مادنيت بين الحمول المزابير...الاتدنا للرسن والشدادي
خليتها عند الوجيه المناعير..عند الهذيلي يوم حسه ينادي
لاد الهذيلي ياحماة المظاهير....لاوايقن البيض روس الحمادي
ويقول جبل
ولايفكرتي يانكرتي من ذبحة الهذلان..تقوم من منامه كل من يسمع بطاريها
عقب كنا ثلاث شهور جيرانِ على مران...تعاقب نشرنا والذاهبة ماينطمع فيها
لعل الديرة اللي طبع اهلها بوقة الجيران..ثمان سنين لاتمطر ولا تعتز اهاليها
ولعل السود فال اللي حضر من لمة العربان...عطا درب السعة والنار تاكل من يصاليها
وانا ليه ثلاث لزم على مزحم بلا جحدان..وابن ثعلي بدى في قالةِ لزمِ يمضيها
والا ياليتني يوم اشهب البارود له دندان..حضرته بم نص خشاب تعجبني مراهيها
ويقول احد شعراء البقوم لراجي بن هديان
انته هذيليِّ من الريعان...عود لدارك من ورى الشريف
فقال راجي
حنا هذيل وجدنا شاهان..مضراب مخلابه مخيف
هذيل البقوم لاينكرون عليهم البقوم الانتساب لهذيل وهم لاينكرون
الانتساب للبقوم بالحلف
لأن شداد الذي امضى الحلف مع آل فضل المرازيق رفض الحلف
المتعارف عليه وهو تغيير النسب والعزوة فاشترط اخاوة الدم وحلف
الماقف الواحد ولم يرضى بأن يعتزي بعزوة المرزوقي
كما قال المرزوقي
انا المرزوقي وجدي عرهب...وباقي القبايل لفويه
قبائلِ قامت تليم...والكل منهم حط عنيه
الا الهذيلي اجنبيِّ صادق....ومضيناه بالجنبيه
وابن عرهب كان شيخ البقوم في سالف الزمان وأشار الى ذلك ابو زيد
الهلالي
ومرينا ديار بقوم بن عرهب..قومِ لياشح الزمان كرام
كذلك قال المرزوقي في معركة السلع المشهورة
عشرين منا نهار الكون بحساب...في قاعة السلع لاجته النصوبا
مع سبعةِ من هذيل الربع الاصحاب..من ملتقين الشقاوي والتعوبا
وقال بالود الصنعاني صانع بن جرشان في موقعة صبحا بين هذيل
وقحطان وزبار الغندور الكريزي البقمي صاحب مربط كروش
نهار صبحا يوم كون هذيل..والخيل كسرها زبار
والله لو اني صانعِ للخيل ...اني ماعلق فيهن المسمار
فهذيل البقوم اسمهم هذيل من جدهم الاول وليس الاسم بجديد على
البقوم او غيرهم ولم تنقطع الصلة بينهم وبين ابناء عمومتهم هذيل
الحجاز فشيخهم الآن مسلط بن بنية بن دياي ام دباي كبكبية
والشيخ مسلط قد تجاوز الثمانين من العمر اي المصاهرة لها مايقارب
200سنة وكذلك الشيخ ضيف الله العاكور مات قبل 4شهور رحمه الله
متزوج اخت الشيخ علي بن هلال الحتيرشي غني عن التعريف
وكذلك الشيخ جابر العرضة رحمه الله متزوج من هذيل البقوم
وهذيل البقوم يربعون في تهامة دائماَ وفي ديار هذيل وطريقهم اذا مدوا اوحجوا لمكة المكرمة يمرون بديار هذيل ويعرفون هذيل تمام المعرفة ومن القصص الطريفة التي تدل على فراسة هذيل اهل الحجاز انه في احدى السنين ذهب نفر من هذيل البقوم مادين مكة
فأضافوا عند عويد العقيفي العتيبي وكان الهذلان البقوم شرار بن قاعد
وسليم بن عبسان وخليوي بن هليل وماجد العاكور ومعهم فوزان السمي البقمي ليس من هذيل ويقول ماجد العاكور رحمه الله
شرار وسليم بيضان وانا وخليوي نميل الى السمار والسمي ابيض
يشبه لسليم وشرار واثناء نحن جالسين نتقهوى حتى جاء ذلك الشايب فرد السلام ورحب به العقيفي وكان معرفة للعقيفي وصديق
فقال يمازحه بقوله ياباعر تقول انك تعرف العرب علمني هذولا منهم منه فقال هؤلاء الاربعة واشار الينا من هذيل ولد العميري من العميرية
اما هذا ليس من هذيل فقام فوزان يعانده بقوله تطلعني من ربعي
وتشكك في يالكاهن اللي ماتخاف الله قال والله ماتعرق في هذيل
فكان كلامه كله صحيح ماعدا العميري من العميرية لأننا حتارشة ولكن
الغاوي في الأخوين مدّل كما قالوا ارجوا المعذرة في الاطالة والقصور
اذا حصل لاسمح الله ودمتم

هذلان هذلان معروفين مافيها جدال لامن هذيل الحجاز ولا البقوم
ومازلت اذكر وانا صغير قبل 13 سنة اننا اضفنا طرقي من المرازيق كان يسئل من من خندف في هذا الحي فأدلوة اهل الحي علينا فستضفناه
وسئل ابي وقال انتم من هذيل ربعنا اللي في تربة ولا هم منكم
فأجابة والدي قال هم منا .


عموما هم هذلان من هذيل بن مدركة مافيها جدل لكي ينقض ولا نبحث عن نقض لاصطناع جدل وهمي فبيت العنكبوت واهن ولا يصطاد الى الفراش الاعمى
فرباء بنفسك ان تجادل او تنقض في المسلمات والحقائق الثابتة عند القبايل كلها

اتمنى للجميع الصلاح والهداية

شكرا أختي على السؤال
لكن بالنسبة لي ماعندي إجابة

هذيل اللي في ديار البقوم عيال عمنا والنعم فيهم


واتمنى ان يعود لديارهم الاصيله او يكتفون بالهذيلي هم واللي مع المطران