دكتوراه تقليد

[مرعب]

((الدال )) قبل الاسم لاشك ديكور

يرفع مقامك بالرتب والشهادات

يُوخذ بمال ويصبح فلان دكتور

صيته مشرّف فالخطب والدعايات

والله يديم ((الواو )) والمال مقدور

حتى تتم المصلحة والعمولات

اخدم وتُخدم والعرب نصفهم عور

تنظر بعين وتغضيَ الطرف تارات

ماعاد لك يالصدق وقفة ولادور

الكذب سايد والآوادم جمادات

والبعض ماله قلب واحساس وشعور

كنه فراغ ولايغطي مساحات

أكبر همومه كسْب يوصل على الفور

ماهمّه المصدر طُموحه جنيهات

وينافق ويكذب ويحتال ويبور

ويدور ويناور ويسهر ولايبات

ويصير لك بالمال ناصر ومنصور

ينسف جبال ويعسف المستحيلات

لاتنزعج وتقول شاعر ومغرور

قصده يبالغ لو ببعض العبارات

احكم بنفسك والدهَر ظلم وفجور

ويعيّف العاقل من العلم بالذات

العلم عند الله وللمقتدي نور

يشعلْ على الجهل وظلامه منارات

ماهو شهادة مكتب وتنكتب زور

وترزّك امحاضر بجدول وساعات

مافاد قارون (( الورق)) وأنت لك شور

لوتتعظ كان اختصرت المسافات

دامك قضيت الماضي أفراح وسرور

قدامك المستقبل هموم وآهات

مير استعن بالله ولو وقتك يدور

الكل يفنى ماتدوم الوجاهات

والمنصب اللي بالوهم شُوم وشرور

لازم تفارق عنه وتموت حسرات

لودام لك ولغيرك سنين واشهور

يقفي وتقفي معه كل المسرّات

لاتنخدع لوصار لك قدر موفور

بيزول وتغني ياطول المعانات

لاهيبة ٍ ودّت ولاجاب دستور

أنتَ نسيت ان العبَر بالنهايات

لابد من يوم ٍ يدقك على الزور

ويصيح يابن آدم كفاية خيالات

لوكان شيطانك على الشرّ مسعور

يهجدْ بفضل الله ويصغي للأصوات

عاتبْ ضميرك واحذر تلف وتدور

وأصغر عمل تلقاه ضمن السجلات

اعرف خطاك وباعد الزيف والجور

واسلكْ طريق الخير والصدق منجات

واقنع بمقسومك ترى منت معذور

لاتجزع وتمضي وتفكيرك أشتات

صلْ استخارة والدعا يشرح اصدور

ويفرّق اهمومك ويكفيك عثرات

ودّك تعيش العمر بايمان واحبور ؟

مبعد عن الهم وحياتك نجاحات

اعرف هدفك ويبطي ابليس مدحور

لاتتبعه يرميك بين المتاهات

ابدا حياة ٍ مابها شيْ محظور

وانس َ اللذي مرّ ومضى وانقضى فات

واليا رجعت لرُشدك العظم مجبور

بسْ شرط تكشفهم في كل المجالات !!

بلغ عن اللي زوّر وصار مشهور

كنه نيوتن في زمان الريالات

اسمه على صدر المجلات منشور

يهرفْ ولايعرفْ ويصرفْ حماقات

وأصبح بطل وهمي بتطبيل جمهور

ساذج ورجعي وانشد وتاجد اثبات

وأنت ليا تعاونت مشكور مشكور

مايشملك تحقيق والاّ عقوبات

لكنْ على راحتك منت بمجبور

سوّ اللذي تهوى وللناس نيّات

والأجر عند الله ولك ذنب مغفور

تلقى الجزا فوز ورضا وانتصارات






..................................................
................................................

صح لسانك

قصيده جميله استمتعت بقراءتها

السلام عليكم ورحمة الله وبركاته

صح لسانك يالمرعب لاهنت

تحياتي

قصيدة جميلة يالمرعب، تعالج ظاهرة خطيرة،

تفشت واستشرت في أوساطنا الأكاديمية،

وأصبحت عديمة المصداقية في الغالب،

صح لسانك وعلى شأنك.

[عطر القصيد]

الكل يفنى ماتدوم الوجاهات


صح لسانك يالمرعب وبارك الله فيك .

[مرعب]

شكرا لمروركم وكل عام وأنتم بخير .

صح لسانك


أختيار موفق

شكراً يا مرعب على القصيدة الرائعة

صح لسانك
يعطيك العافية