سلام تسليم يشدى الكيف في بيض الفناجيل

	المشاركة الأصلية كتبت بواسطة سلطان السويهري

	شكرا لمن جمع المحاورة في قالب واحد ليظهر جمال الابداع ابا ريتال لك من كافة الأعضاء الشكر والتقدير وبيض الله وجهك وتصبحون على خير جميعا

	المشاركة الأصلية كتبت بواسطة كفو

	ياسلام ياسلام صحت ألسنتكم وبيضان وجيه مشكووووورين جميعاً شعار وحضور ومتابعين وشكر خاص لابوريتال

العفوو هذا حق وواجب علينا

والشكر موصول لأبو نايف ولضيفنا الكريم

ولهم كل التحايا والتقدير

محمد البلوي ( أبو تركي )

سلام تسليم يشدى الكيف في بيض الفناجيل
البن خولان وألما من هما ليل السحابة

آبديه لهذيل واللي حاظراً في مجلس هذيل
قلته وانا شاعر قضاعي ولي عزوه ولابه


..


خالد الهذلي ( أبو نايف )

يامرحبا عد ماناضت بروق وسيل السيل
وعداد ماغنت الشعار مع قوس الربابه

حسب النسب والعوايدمانطف الوزن والكيل
والدرب مجرود والساري يجهز له زهابه

..

محمد البلوي ( أبو تركي )

دام البقا والبروق تلوح في وسط المخاييل
لكن خالد درى فالعلم والا مادرى به

اكبر حزامك وليلك ي وسيع المعرفة ليل
ان لم تكن ذيب في مسراك تأكل الذيابه

..

خالد الهذلي ( أبو نايف )

الي مضى من زمنا جابلي علم المقابيل
ان كان تقرا الكتب وش قيل من عهد الصحابه

ان كان تقدر طراد الخيل هيا جاتك الخيل
دونك رجالاً من اول ماتحيد عن الحرابه

..

محمد البلوي ( أبو تركي )

تاريخنا اللي مضى محفوظ جيلا من بعد جيل
مانتركه لويجي فالوقت ميله وانقلابه

ي راكب الخيل عاصب راسك تجر المواويل
وانا وصلتك من اعلى الجو ما فيها غرابه

..

خالد الهذلي ( أبو نايف )

الدرب من شام ولامن يمن شوف المداخيل
والياقريت الرساله قلت لك ويين الكتابه

العام خابرك يامحمد تجيب لنا التماثيل
واليوم اشوفك تغازي الذيب في روس الشعابه

..

محمد البلوي ( أبو تركي )

تنشد عن العلم وانت مثبته صوره وتسجيل
ي كبرها بالزعيم اللي تزعم للعصابة

وانا خبرتك قديم الوقت شاعر ذرب وحليل
واليوم خالد نسى مافات مدري ويش صابه

..

خالد الهذلي ( أبو نايف )

اخاف بكره عليكم مايجي فيها تساهيل
الطيب الي ليامن قام في جنبه صوابه

احليل هذي بعيده قول يامقواك يالحيل
والحبل مفتول والجابه نلاقيها بجابه

..

محمد البلوي ( أبو تركي )

حاسب حسابي ولو مال الزمان نعدل الميل
وخالد يبا الجنه الخضرا ويسعى في عذابه

لا يدخلك شك وانته رجل من روس الرجا جيل
إبليس يخلف قوي العرف عن طرقة صوابه

..

خالد الهذلي ( أبو نايف )

الصيد حزات ماتكفيه بعضات المعاميل
والوضع محسوم لكن لاتكثر فالطلابه

ليت السوالف تغربل عند اهلها بالغرابيل
حتى تعدي لياعرضت على لجنةرقابه

صحت الألسن ابداااااااع

نرحب بضيف مجالس هذيل الشاعر محمد البلوي


لي عوده لتعليق مجددا

ابو تركي البلوي
خالد الهذلي

طاروق مميز وشعراء متمكنين صحت الالسن وبيض الله وجيهكم

	المشاركة الأصلية كتبت بواسطة ابوتركي البلوي

	دام البقا والبروق تلوح في وسط المخاييل لكن خالد درى فالعلم والا مادرى به اكبر حزامك وليلك ي وسيع المعرفة ليل ان لم تكن ذيب في مسراك تأكل الذيابه

أتوقع أخونا الشاعر محمد يقصد أكرب حزامك

نرحب بأخونا الشاعر القدير محمد البلوي في مجالس هذيل عند اخوانه

والطاروق ابداع في ابداع


صحت الألسن ياشعرائنا على الإبداع والامتاع
نشكر أخونا الشاعر خالد الهذلي على جهوده


ونسعد دائماً بتواجد الشعراء أمثالكم

ومتابعت الحراك الشعري بما لديهم في ميدان الشبكه العنكبوتي هـ


اجمل التحايا

صح لسان الشعار

كلام جميل

الف شكر لكل من عطر المتصفح بمروره الراقي
ولكوني داخل من الجوال جمع رد واحد
والا كل واحد يستحق رد لحاله يعلم الله

محاوره رائعة من شاعرين كبيرين ابوتركي البلوي وحياه الله في منتداه
وشاعرنا المعروف والمميز خالد ابونايف بيض الله وجهه
وبيض الله وجيه كل المشاركين والمداخلين
في هذا الشامخ السامي

الله الله وش هالابداع

صح لسانك يابن بلي

وصح لسان ابن العم

طاروق كايف حقيقه

وبيض الله وجيهكم

صحت الالسن وياهلا بالبلوي
ابدع الجميع
ابو نايف الابيات الاخيره كانت خير ختام


مساكم عطر جميعا ...