قصائد الشاعر صالح بن رويجح الهذلي .....

الشاعر صالح بن محمد بن رويجح المطرفي الهذلي احد ابرز شعراء قبيلة هذيل
شاعر محاوره ونظم وحداء وهو اشهر من نار على علم له كتاباته الساحره واحاسيسه المدهشه
شاعر يجمع الجزاله والحكمه بمفردات لا تخلو من الغموض الواضح فيجمع عناصر القصيده الرائعه من
اطرافها ليصبها في طبق من التفرد سجل لنفسه مسيره مميزه فالشعر الشعبي واثرى الساحه شعرا
كما سجل لنفسه سيره طيبه محموده
من خلال علاقاته مع كافة شرائح المجتمع شاعر يفتخر بأنه واكب جيل العمالقه
امثال شاعر هذيل عبدالله المسعودي الله يرحمه
له العديد من المقابلات التلفزيونيه فالقنوات الفضائيه امثال قناة فواصل وقناة الصحراء
وقناة البوادي وقناة المرقاب
وله ايضا مقابلات فالاذاعه مثل برنامج الباديه مع ابن شلاح الله يرحمه وبرنامج محطات شعبيه
شاعرنا ابو خالد له الكثير والكثير من قصائد النظم و يسعدني ان اوثق بعضاً من قصائده
في مجالس هذيل وتعتبر هذه القصائد من القصائد القديمه لشاعر صالح بن رويجح المطرفي الهذلي :





أخذتك الاسفار

لا والله الا رحت واخذتك الاسفار = وغيرت ديرتنا بديره جديده
وزادت هموم القلب بعد الذي صار = ومثلك يداوي جرحنا مايزيده
لكن لك فالقلب حشمه ومقدار = لو رحت عنا فالديار البعيده
نبني على رفقتك سيسان وادوار = انت الصديق اللي سلوكك حميده
جربتني يأخوك تكرار وامرار = ماني من اللي يخلفون الوعيده
من عاد اكلم بعد فرقاك فالدار = ومن عاد يرفع لي جهاز الحديده
ومن عاد يعطيني سواليف واخبار = ومن عاد يأخذ مني اللي يريده
الله واكبر حبل الايام دوار = ناس تموت وناس تحيا سعيده
يسترك رب (ن) للمخاليق ستار = وانا يعوضني معوض عبيده


, , , ,





ونتي ونة اللي


ونتي ونة اللي من شفا البير طاح = رمثت به حبال مال يرويبها
يأهل العشق ياللي صدق ماهو مزاح = روح مجروح عالت ويش اسويبها
من يلوم الصويب اللي يلج الصياح = ماتقله عظامه يوم يمشيبها
واهني ليتني طير وليه جناح = واقضي اغراضي اللي لي واجيبها
ماحد يعلم بدربي فالمجي والمراح = حاجتي مابغيت الناس تدريبها
يوم اشاهد حسين الوصف سيد الملاح = له عيون (ن) تهز القلب من طيبها
عهدنا به صلاة العصر جوف المراح = والعشا وانها دارٍِ عوى ذيبها
اشكي امري على مذري هبوب الرياح = خالق الروح ومسهل مطاليبها
يجمع الشمل باللي سدها مايباح = عند حسن العقيده يوم عهدي بها

, , , , , , ,




ياقمر عشرين


ياقمر عشرين ياباسط ارض المسلمين = انت نورك نور للي يغرون الطريق
دلني دار الغضي مولع القلب الحزين = من بعد فرقى حبيبي على جسمي حريق
أتعين والتفت فاليسار وفاليمين = وانشد العربان ماعطوني العلم الحقيق
اه واعزاه كنا سوى متوالفين = والعشيه حال من دونه البحر الغريق
بعدوهم عن وطنا النجوس الحاسدين = يعلم الله ماظلمنا ومولانا مويق
ياعيوني كيف بالنوم بعده تهتنين = حق لك طول السهر مابعد خلك صديق
يالله انا ارجيك ياللي تعيين الصابرين = ارحم اللي دمع عينه كما عين المضيق
ياحبيبي حق فوقك بعد طول السنيين = انت تعرف منزل المشتقى وسط الفريق
اكتب المكتوب بأسم العباد العاشقين = وان وصلنا خطكم صح مابعدك رفيق

, , , , , ,




ياطير ياللي


ياطير ياللي تلد وتلتفت يمي=منته بطير ٍ دخل فالقلب تذكاره
الطير طير ٍ قطعني من ولد عمي=ثلاثة قرون كل ٍ يروي اخباره
ماني بناسيه من لحمي ومن دمي=وقلوب الاجواد فوق الوقت صباره
قالو نطح نجد ابو عجلان متحمي=واختار في نجد ميراده ومصداره
قلنا متى يستدل الدرب ويتمي=يذكر قبيلة هذيل ويذكر دياره
قالو غرس غرس وامسى الغرس متنمي=فالرغبه اللي يمين الدرب ويساره
وافرحني اللي لقيته وانجلى همي=كل ٍ نزل في محل ٍ جاه واختاره
وفالحفر هذلان كم نعد ونسمي=في كل حي ٍ من الاحيا لهم حاره
الشعب واحد وشمل الربع ملتمي=لازم تزوروننا ونقوم بزياره

, , , , , , ,



ياعين لاتبكين


ياعين لا تبكين مرواح الاحباب = تصبري والغايب الله يجيبه
كم صاحب(ن) قفا وكم صاحبن(ن) غاب = كم صاحب(ن)حطو علاه النصيبه
واللي يغيب اشوى من ادراك الارقاب = انا اشهد ان الموت فارع مصيبه
فرق ما بين اثنين والجسم ماطاب = وامسى الحبيب مايلائم حبيبه
الياس دونه حال والحال قد ذاب = واهني ليته رايح في مغيبه
يمكن تعود ايام وليال الاصحاب = الا فراق الموت رجواه خيبه
ويأهل الهوى هذي مقادير واسباب = ومن لاصبر نال الردى والغليبه
اعذل على قلبي اليا اطراه هنداب = وادرٌي واداري علم مايندريبه
واقول يقضي حاجتي رب الارباب = وتبع الهوى ياناس ماهو غريبه
خاضوه قدامي طويلين الاشناب = مخلد قثامي شاعر من عتيبه
غيره سبيل كم وايق بمرقاب = وصرف تماثيل الوليف العجيبه
وقدامهم مجنون ليلى ياكم جاب = لو جاب ليلى بنت عمه خطيبه
لكن أخذ في سيرة العشق مصلاب = وصار اخرته الموت والله حسيبه
وعنتر وكم نعد من ذات الانساب = كلاً رياله فالهوى يشتريبه
خلو دموع العشق تسكب تسكاب = وفي وقتهم نالو دروب صعيبه


, , , , , , ,





كيف اسوي به



على القلب نيرانن تزايد ملاهيبه = ويطريه في ليله طواري ونياتي
على شأن حياً عشقهم كيف اسوى به = بلاتني محبتهم على كل مجهاتي
ولا ياجواباً من طواري اغنيبه = على طول صدر للقرايا الطرياتي
وبلغ سلامي من رمتني مضاريبه = وعقب على كبدي من الود لوعاتي
رماني وفي نومي مع الليل اهذريبه = ولا عاد يطريني من النوم لذاتي
صحيح البنادم قدرته في مكاتيبه = نصيبه يسوقه لو فدرب عوجاتي
سقى الله ديار الجادل اللي عوى ذيبه = وخلاه طول الليل سهران ماباتي
عسى الله يلم الشمل وأوفي مواجيبه = ليا لمنا الله مانهاب الصعيباتي
بلاني وخلاني وياناس احليبه = أحلي بنور اربع طعش فالسمواتي
ليا ظلت العربان بالليل تسريبه = وشعشع بنوره في ليال الظلماتي

يازين



يازين ماهي بعاداتك تزعلنا = في مامضى كل كلمه منك مزاحه
واليوم ماكننا عشنا ولا كنا = نجلس بحيد الرصيف بدون طراحه
ان كان مانتصل محدِ يواصلنا = الهم بقلوبنا والناس مرتاحه
حمستنا مثل حمس النار للبنا = ماعاد قلب المولع تبرد جراحه
ليتك تقول الحقيقه ويش حصل منا = والعذر يكفيك والشرهات منزاحه
انزيحها ماتًرد الهينه عنا = لك عندنا حشمة القناص لسلاحه
لولا معزتك لا قلنا ولا ارسلنا = غيرك مجيئه علانا مثل مرواحه

, , , , , ,


الدنيا



في منامي شفتلي بنت طلعتها حلا = شمعةً بيضاء تلالا ولاهي ظابسه
كان أنا وياك يابنت فالهم ازملا = ساعديني واتكي للهموم الكابسه
طاوعيني واقبلي وانت تقافيتي فلا = نص دمعي بان لك والبقيه حابسه
البسي ثوب المحبه وقولي لي هلا = لا تصدين النظر والمعنى لابسه
وامسحي دمعة وليف تعداك اولا = شاف زولك وانثنى والشفايف يابسه
ساعديني وارفعيني لدور العلا = لا عليه تفرحين الوجيه العابسه
أن نظرتك مقبله زال همي وانجلا = وانطفت نار ِ بقلب المعنى قابسه
قالت ابشر كل شيء تمناه اقبلا = وابشر ان الخير ماقفلت محابسه
ياعسى منهو يزعلك يبلى بالبلا = تنكسر يمناه والساق الايسر جابسه


, , , , , , ,



وا روحي اللي




وا روحي اللي علاكم دوم مشغوله = ان وقت فالضلع وان حولت للوادي
ماعاد احسب قصير الليل من طوله = صك التلفزون واستبديت بالرادي
دارِ غشاها الحيا ماهي بمجهوله = طلع الثمر من شجرها المسك والكادي
ان كان ماهي من العربان منزوله = ماخاب ظني ومصداري وميرادي
تفكى ترى الروح بين يداك مقتوله = والخير دوبه حصل والشر لاعادي
والدعوه اللي بغير ثبوت محلوله = لو قال منهو يقول ورًد الانشادي

l

انا محتار



قاله اللي دمع عينينه غزير = في نهار العيد والجمع الغفير
يوم كلاً من فرح عيده يطير = والمولع مثل مكسور الجناح
مامعه حيله يزور حبيبه = والحبيب العام كان قريبه
يالله انك غيب اللي غيبه = ثم ريح خاطر اللي مستراح
لاكتاب نُرد عنه ولا خبر = لاجل اقص الدرب وامشي في قطر
ماعلي خلاف لو أخذ شهر = في رضا الغالي رضا سيد الملاح
اشهد اني ان تحصلته سعيد = وانه اطيب عيد واسعد يوم عيد
لو مسافه عام ماكنه بعيد = والتعب ممنون واللي راح راح
يالله انا ارجوك فالصبر الجميل = ياكريم مايجي مثلك مثيل
انت تعلم بالكثير والقليل = عين راع الصدق ماهو بالمزاح
عينني يالي تعين الصابرين = كم لي شهور مرت مع اسنين
والدموع نهلها من كل عين = وان ذكرته فاح دمع العين فاح
حسبي الله فوق من كان السبب = كم من مسلم يفرقله عرب
يشعل الكبريت في حيد الحطب = وانها نار تواشيها الرياح
وانها نيران في جسمي لهيب = تشتعل وهموم قلبي ماتغيب
وان بغيت انهض على العظم الصليب = كن صايبني على عظمي سلاح
هذي امثالي وانا ماني كذوب = اعرف ان الكذب نوع من الذنوب
مير انا محتار من بعض الدروب = ياجزيل العفو عفوك والسماح



مع تحيات اخوكم ..

.. بن عادي العميري الهذلي ..

الله الله بالردود الزينه ياربعي

الله الله

قصايد جزله من شاعر جزل ولاهي غريبه على ابن رويجح

وتشكر يابن عادي على جمع هذه القصائد ولاهنت والله يعطيك العافيه

ننتظر جديدك عساك على القوه ..

بيض الله وجهك على هذه الدرر للشاعر العلم ودكتور الحداء صالح بن رويجح الهذلي


لاهنت يابن عااادي .

[ماطر السويدي]

بيض الله وجهك يا ابن عادي على هذا الطرح

للشاعر صالح بن رويجح وتوثيق جيد وتقدير

اعلى الله يعطيك العافية ولا يحرمنا منك

ولك الشكر على هذا الاهتمام بشعراء

اعلام من شعراء قبيلة هذيل فتقبل

مروري وتقديري

مشكور يابن عادي على هذا العمل الرائع والجميل

والشاعر صالح غني عن التعريف

تقبل تحياتي اخوك ابوعمار

	المشاركة الأصلية كتبت بواسطة تميم الهذلي

	الله الله قصايد جزله من شاعر جزل ولاهي غريبه على ابن رويجح وتشكر يابن عادي على جمع هذه القصائد ولاهنت والله يعطيك العافيه ننتظر جديدك عساك على القوه ..

العفو اخي تميم

ومرحبا بك يالذيب

ولاهان غاليك والله يبارك فيك


وشرفني مرورك يالغلا

	المشاركة الأصلية كتبت بواسطة مطرفي الدلم

	بيض الله وجهك على هذه الدرر للشاعر العلم ودكتور الحداء صالح بن رويجح الهذلي لاهنت يابن عااادي .

وجهك ابيض يامطرفي الدلم

ومرحبا بك يالغالي

وشرفني مرورك يالذيب

بيض الله وجهك يا ابن عادي على هذا الطرح

للشاعر صالح بن رويجح وتوثيق رااائع لعلم من اعلام الشعر الهذلي


والله يعطيك العافيه

سلمت ودمت ويحفظك الله ويرعاك أيها القلب الخافق بالعطاء والنابض بكل ما هو جديد ومفيد من التراث الهذلي المجيد لتضخ في شرايين الموقع ثمرات جهودك وأفانين عملك الدوءب حقيقة يعجز لساني عن شكرك كما ينبغي ، ولكن لا أملك لك سوى صادق الدعاء بأن يوفقك الله في دينك ودنياك وفي عاجل أمرك وآجله.

مثمنا لك اختيارك وتدوينك لشذرات ذهبية من فرائد الشاعر العلم / صالح بن رويجح المطرفي ، وأعلم أن لديك الكثير من تراثه الذي سنسعد به وسنجده في هذا الموقع لاحقاً.

تقبل مروري وبالغ تقديري وتقييمي للموضوع ولشخصك الفاضل.

	المشاركة الأصلية كتبت بواسطة ماطر السويدي

	بيض الله وجهك يا ابن عادي على هذا الطرح للشاعر صالح بن رويجح وتوثيق جيد وتقدير اعلى الله يعطيك العافية ولا يحرمنا منك ولك الشكر على هذا الاهتمام بشعراء اعلام من شعراء قبيلة هذيل فتقبل مروري وتقديري

وجهك ابيض يابو فهد

ومرحبا بك يالغالي

والله يعافيك ويبارك فيك


وشرفني مرورك الرائع

الله الله يابن عادي عز الله ماقصرت في جمع قصائد الشاعر الكبير صالح بن رويجح المطرفي الهذلي وابشرك انا لقيت اكثر من قصيده كنت ادورها لابن رويجح والفضل لله ثم لك يالذيب
بيض الله وجهك والله يوفقك دنيا واخره ويحفظك من كل شر اعلى تقييم للموضوع ولك يابن عادي

	المشاركة الأصلية كتبت بواسطة أبو عمار

	مشكور يابن عادي على هذا العمل الرائع والجميل والشاعر صالح غني عن التعريف تقبل تحياتي اخوك ابوعمار

العفو اخي ابو عمار

ومرحبا بك يالذيب


وشرفني مرورك ياذوق