قصيده لشاعر عايض بن سعود الهذيلي البقمي

عد ما صلو فـروض الصـلاة الصايميـن
اذكـر الله واشكـره واتقـيـد بالنـظـام
ذكر ربي خير ذكر(ن) يقـال بكـل حيـن
جل شانه مبدي النور مـن جنـح الظـلام
ابتديبـه والتجيبـه وبـه دوم استعـيـن
واذكره فالمبتـدى واذكـره عنـد الختـام
من لجابه والتجابـه كسـب دنيـا وديـن
ومن عصاه اعمى بصيرة ويغشاه المـلام
ربنا اللي كلنـا تحـت رحمتـه اجمعيـن
ابتهله وأسألـه بافضـل اسمـاه العضـام
واطلبه يغفر ذنوبـي وذنـب الحاضريـن
واطلبه عفـوه ولطفـه نهـار الازدحـام
في نهار(ن) قدمه احفاة(ن) اعراة(ن) نبين
والعرق بعـض المخاليـق يلجمهـا لجـام
جعلنا برضاه نحسب مـن اللـي فايزيـن
بالصـلاه وبالصيـام ودعانـا والقـيـام
والصلاوات وسلامي على ازكى المرسليـن
الرسول المصطفى خير من صلـى وصـام
وكل عام وانتـم بخيـر ومـن العايديـن
يا هذيل ومن حضر واستمع نـص الكـلام
ويا وطنا عـاد عيـدك وكـل المسلميـن
كل عام(ن) يا وطنا تعيـش امـن وسـلام
في ظلال القايـد اللـي يغيـث المعسريـن
جعل عود(ن) عقبه في فسيحـات الرحـام
قلتها من هاجس(ن) يعشق القول الثميـن
ما يقدم غير شيء(ن) علـى قـد المقـام
والبيوت الها شوارد وصعبـة مـا تليـن
كـود للـي ملهمـه ربنـا فيهـا الـهـام
والمعاني تتعـب الفكـر والعقـل الرزيـن
من يقول انه تعب من سببهـا مـا يـلام
غصت في غباتها من شمال ومـن يميـن
عاصب(ن) راسي وجاشي ربطته بالحـزام
والحقيقة جيت منهـا معـي خفـي حنيـن
ما بلغت لمقصـدي واعذرونـي يالحشـام
الطموح اكبر من القـول وانتـم عارفيـن
يا رجال(ن) في ضميري لكم كـل احتـرام
عيدكم عيد الفرح فرحتـي بـه فرحتيـن
فرحتي بالعيـد وبشوفكـم فـي كـل عـام
والتواصـل والتكاتـف صفـاة المؤمنيـن
والتباعـد والتشاحـن يجيـب الانقـسـام
يا رجال(ن) تدركـون الامـور وفاهميـن
اجتمـاع الصـف للنـا عــز ولـلأمـام
والوفاء والطيب سلـم الرجـال الغانميـن
ومن برك في مبرك الهيـم لا بـده يهـام
ولا يلم الشمل كـود الرجـال المصلحيـن
ولا يفرق صف الاقراب كود ابـن الحـرام
يا هذيل انتم هل الفعـل والـراي السميـن
وانتم احفاد الصحابة هـل الفعـل التمـام
بالفتوحات القديمـة لهـم فعـل(ن) يبيـن
مع نبـي الله سطـو فالمهمـات الجسـام
جيتو من اديارهم فـي قديمـات السنيـن
والسبايـب كلبوهـا الشجاعـة والخصـام
بأسمكـم واموالكـم والقبايـل شاهـديـن
ونفتخر باسم الهذيلي لنـا مثـل الوسـام
يعني النا الاصل والاصـل بـه متمسكيـن
ولا يدس الراس تحت الثراء كـود النعـام
احتفظنـا باسمنـا فالـجـدود الالولـيـن
يوم بعض الناس فالناس ضايـع فالزحـام
سيرة(ن) نفخربهـا فالزمـان وصادقيـن
وفعلنا ذكـره يحـزم الخشـوم ام العـرام
قلتها اشرح ماضي الوقـت للـي جاهليـن
والحقايـق واضحـه للرياجيـل الفـهـام
يوم جينا في حضن وانبنا الساس المتيـن
بـارك الله فالمنـازل وقـام الحـظ قــام
ما ذبحنا شـاة غـرم وطلبنـا المحسنيـن
روسنا عليـا واخذنـا المقاصـد والمـرام
اثبت اللي قلـت لـو يسألـون السايليـن
الكلام اللي بـلا ثبـات مـا يرفـع مقـام
فعلنـا قبـل وبعـد واحمـد الله فايزيـن
فالمعـارك كلهـا مـا نعـرف الانـهـزام
يوم جينا فـي شعـر بالشجاعـة نازليـن
قالها بشيـر يـوم يعـرض فـوق العـدام
ما نزلنـا بالتمسكـان وافهـم يـا فطيـن
نازليـن بقـوة الله ونضـرب بالسـهـام
افتخر في فعل ربعي واغيـض الحاسديـن
عقب اللي ما يماريبهم شـرق(ن) وشـام
والقبايل نعـم مـا اقـول عنـا قاصريـن
كل قوم(ن) عندهم طيب ورجال(ن) كـرام
يا شبـاب هذيـل واعـم كـل السامعيـن
اسمعو منـي نصيحـه عطوهـا الاهتمـام
طاعـة الله يـا النشامـا وبـر الوالديـن
ما يخيب اللـي عليهـا يـداوم واستقـام
والغلو فالديـن مكـروه وانتـم دارسيـن
الكتـاب وسنـة المصطفـى خيـر الانـام
والمراجـل للرياجيـل مـن كـد الجبيـن
خير من نوم المهبل علـى ريـش النعـام
والثقة بالنفس والعلـم كنـز(ن) باليديـن
تبني بيوت(ن) بليـا عمـد كانـت هـدام
وانتم ابنـا قـوم للطيـب كلـه حايزيـن
الرجـال اللـي تسـد اللـزوم بـكـل زام
للعلـوم الغانمـه والمـراجـل كاسبـيـن
الشجاعـة والكـرم والوفـاء والالـتـزام
افعالهـم فالفعـول مشوقـه كـل عـيـن
واقسومهم فالديـار اخـذوا فقـار وسنـام
اعدودهم في حضن تروي ضما الوارديـن
وغروسهم في حدود سبيع الهـا احتـرام
ما جت بحب الخشـوم وكلبوكـم خابريـن
جت من جهود الرجال اهل العزوم الهمـام
وانتم خلف للسلف وانتم عـرب واحديـن
ومن بينكـم لا يصيـر الشـك والانتقـام
تـرى الرفيـق لرفيقـه جعلكـم سالميـن
في سلم والانهار(ن) فيـه عـج وعسـام
والدار بحصونهـا والرجـال المخلصيـن
والمشكلـة بالحلـول وخلـو الاصـتـدام
ومن كان فعله بربعه جعـل فالـه يشيـن
ولعل بيت(ن) ما تنصـاه النشامـا الهـدام
الطيب عكس الـردا يـا ربعنـا الطيبيـن
والصف ما ينهزم لا صـار فيـه التحـام
والواجب ان العـرب بالطيـب متكاتفيـن
يقـدرون الكبيـر ويـرشـدون الـغـلام
ابديت ما يكفـي لعقـل الذكـي والذهيـن
ويمـر مـا عبـروه الجاهليـن الغـشـام
وذكرت فعل الرجـال اجدودنـا السابقيـن
عصر(ن) مضى يوم وقت الهوش والاحتدام
حنا هل الشعر بعض النـاس مستشعريـن
قصايد هذيـل تـروا عنـد شمـر ويـام
قصيد سالم وعايد ما اختلـف بـه ثنيـن
انه مع هل الجزيرة ضمـن عـذب الكـلام
قلته وحنـا البقـوم مخلصـة كـل ديـن
لا طار ستر الهنـوف ام الكحـل والزمـام
نفخر بجمع البقـوم وكـل قاسـي يليـن
اهل الفعـول الشهيـرة محتميـن الجهـام
والله يعـز الوطـن والاسـرة الحاكميـن
وحنا سندهم على الطاعـة نشـد الحـزام
دون الوطـن كلبونـا ننطـح المعتـديـن
بالروح نفد الوطن لو كـان رحنـا عـدام
وهذي قصيـدة لربعـي بالكـلام الثميـن
مـا قلتهـا للتسلـي والهـواء والـغـرام
لو كان انا العاشق اللي من قديـم السنيـن
غرقان في بحر حـب مرودعـات الوشـام
والخاتمة باقي(ن) فـي خاطـري كلمتيـن
باقولها واطلـب المولـى واختـم الكـلام
يالله يالله لا تجعلـنـا مــن القانطـيـن
انزل لنا الغيث يـا منشـي ثقيـل الغمـام
حال العرب والديـار مخيـف يالله تعيـن
يشيـب الطفـل لـو انـه بسـن الفطـام
اديارهم ممحلـة ومـن الضمـا مخطريـن
ونخيلهم من اسنين الوقت صـارت حطـام
يالله يالله تزينـهـا بفضـلـك تـزيــن
يا واحد(ن) نطلبه طـول الدهـر والـدوام
انت العزيز القوي وانت اكـرم الاكرميـن
وانت الذي دوم عينك ساهـره مـا تنـام
تمت وانا استغفرك يـا ارحـم الراحميـن
عبدك وقدمك وانـا كلـي خطايـا واثـام
والصلاوات وسلامي على ازكى المرسليـن
الرسول المصطفى خير من صلـى وصـام


[/frame]

مشكور يا ابو يزيد


وصح لسان الشاعر


وبغيت انشدك هو شارك في شاعر المليون

مشكور يا أبو يزيد على النقل المميز

وصح لسان الشاعر /ا لشاعر عايض بن سعود الهذيلي البقمي..


وننتظر منك المزيد

هادي الهذلي
عز الرفيق
تقبلو تحياتي
والشاعر شارك في شاعر المليون