محاوره بينى وبين شاعر عتيبى
اخوانى هذه محاوره بينى وبين احد شعراء العتبان فى احد منتدياتهم والذى سمى
نفسه باابن عصيم وقد كنت انا البادى وكذلك اخر من رد. وهى موجوده فى منتدى
الهيلا.
انا:
الليل يا الشعار جاكم هذيلى
عزمه قوى ويهد من فيه حيلى
يغرف من ابحور(ن) مداها طويلى
وهذا الصحيح اليا بغيتوا الصراحه
يبا يصدركم يمين
ها ثم ياخذكم يسار
ضارى على الشى السمين
لأنه من الناس الكبار
ابن عصيم:
يا مرحبا يا متعبين الشدادى
جمع الهذيلى يا كعام المعادى
انتم من الحضران والا البوادى
وهذا الصحيح اليا بغيتوا الصراحه
يا صاحبى خلك ذهين
واحسب لها كل اعتبار
لا تظهر السر الدفين
والنار مصدرها شرار
انا:
الك البقا يابن عصيم العصامى
ان كنت من اهل نجد والا تهامى
ولنا مع البدوان عرف وسهامى
وهذا الصحيح اليا بغيت الصراحه
ما نعرف الا كل زين
والضيف يلقا شب نار
مير انتبه لا تلد عين
والذيب يدخل كل دار
ابن عصيم:
ربعى عزاتى مخلفين الهقاوى
سيل(ن) على جيش المعادى نحاوى
مير انتبه لاتخلطون العزاوى
وهذا الصحيح اليا بغيتوا الصراحه
الذيب عاوى من سنين
يشكى من اسباب الجوار
وش عود الحبه طحين
يا كود من طول الحصار
انا:
والنعم بك ما فيه شك(ن) وريبه
شعرك رزين وكل مقصد تجيبه
فى منتداكم شفت حاجه غريبه
هذا الصحيح اليا بغيتوا الصراحه
ناس(ن) تغفى المسلمين
فى انساب وعلومن صغار
وانتم رجالا غانمين
حاشا يجيكم اى عار
ابن عصيم:
لا ثارت الهيجا فحنا رحاها
يا موصل الدعوى ليا مستواها
عتبان يخسى ويعقب من لقاها
وهذا الصحيح اليا بغيتوا الصراحه
حنا لنا جنبن متين
والحرب قصاف العمار
فى كل وقت وكل حين
حنا مسرجة المهار
انا: زانت لى
لأهى بحرقانه ولأهى بنيه
الظاهر انك ضاربن لك نحيه
انت ولد اعصيم والا عطيه
هذا الصحيح اليا بغيتوا الصراحه
حنا هذيل الصارمين
تشهد لنا كل الديار
تاريخنا غصبن يبين
ماهمنا بس(ن) وفار
ابن عصيم:
الظاهر انك ما عرفت العتيبى
يومك زبنت بطايلات ألشذيمى
حنا كحل عينك وسقم الحريبى
هذا الصحيح اليا بغيتوا الصراحه
يا صاحب الطرف الحسين
خلك على نفس المسار
هذا زمان الفاسقين
يبدل حصانه حمار
انا:
يا بنيين بيه بجرفن هيالى
البس شماغك ثم حط العقالى
وجود ركونك ودن منك الحبالى
وهذا الصحيح اليا بغيتوا الصراحه
اسمع ترا ساسى حصين
مبنى على صبة حجار
ماهوب مبنى فوق طين
تذريه حبات الغبار.
وسلامتكم لانه ما عاد رد
|