عبدالله ابا اوصيك و اسمع وصاتي
قبل الرحيل و قبل ياتــي مماتــي
جربت في الدنيــا الكثيــر بحياتــي
عارف سعادتهــا و عارف شقاهــا
صل الفروض الخمس واتقن صلاتك
وهي الصلــه بالــرب وهي ثباتك
ما ينفعك حــيٍ ولا فــي مماتــك
إلا الــصلاه و ماتقــدم سواهــا
النفس تامــر بالخطــى وانت تعلــم
خلك تحاربهــا من الشــر تسلــم
ومن هو يطاوعها بعد وقت ينــدم
احــذر تطاوعهــا وتتبــع رضاهــا
وابعد عن اصحاب الحكي والنميمه
اهل الدناسه والنفوس السقيمه
مامــن و راهم خيــر و لا غنيمــه
غير البــلاء و الشــر كلــه وراهــا
ترى الجليس من الجليس يتعلــم
بافعال مــن جالــس تــراه يتكلــم
امــا حــلال الفعــل و لا محــرم
امــا سعــادة نفــس و لا عناهــا
خلك مع اهل الطيب في كل الاحوال
تلقى لهم في منهج الخيــر مجــدال
وترا النفوس الطيب من طيب الاعمال
و من هــو يــدور للسعــاده لقاهــا
و جارك لا يسمع منك هرجه رديــه
الجــار له واجــب و فوقــه و صيــه
اصبــر لونــك جتــك منــه الخطيــه
اصبر ونفسك ردهــا عــن هواهــا
و ربعك ليا قِسيت عليك الليالــي
دونك يشيلون الحمــول الثقالــي
احذر تخالفهــم ثقــات الرجالــي
و دنيــا بلا ربــعٍ قليــلٍ حلاهــا
هذي نصيحة من يعزك و يغليــك
انصحك انا يابوك حسب الثقه فيك
و الله ينور لك طريقــك و يحميــك
والنفس عند اللي خلقها حماها
و صلاة ربي في نهايــة كلامــي
على نبــي زال ظلــم الظلامــي
نور و هدى لامة محمد يمامــي
على طــريق النــور قايــد لواهــا
الشاعر/ معوض بن درويش المسعودي الهذلي