هذيلي في نيوزلندا

السلام عليكم ورحمة الله وبركاته

إخواني أخواتي الكرام هذه قصه حصلت لي عندما كنت في الخارج قلت اذكر رحلتي كاملة لكم و أوسع صدوركم بسردها لكم على شكل حلقات لطولها والقصة صحيحة دون زيادة أو نقصان أبذكر كل شي حتى العيوب وهي على كل حال فيها فائدة وعظة ومواقف وطرائف وهي مسلية لكم طالما أن طلاب المنتدى راحوا يذاكرون ابقعد أسولف لكم الين ماتخلص امتحاناتهم وينجحون ويرجعون لنا بالسلامة .

البداية :

في نفس هذا الشهر من العام الفائت جلست أفكر وقلت في نفسي ياولد الصيف قرب وطباخ التمر اللي يطبخ معه البشر قرب وأنا وش جلسني في هالحر طالما عندي إجازة !! ليه ما أسافر وأغير جو بدل جلوسي هنا !

قلت لنفس طيب قررنا السفر لكن وين أروح ؟ وين تروح يا فهد وين تروح ؟ وخاصة إني من الأشخاص اللي يستغلون أوقاتهم في شي مفيد طبعاً مو كل الأوقات- لكن نصف الأوقات تقريبا لذلك أبي شي مفيد لي .

وأنا أتصفح احد المواقع الأجنبية شدني موضوع فجلست اقرأ الموضوع ولأني لغتي ليست قوية لدرجة أن افهم كل شي مكتوب قدحت فكرة في راسي !!

ليه ما أروح ادرس انجليزي ومنها سياحة وتعلم ؟

واستقريت على هذه الفكرة اللي فعلاً أجزمت أنها جت في وقتها ، وفي نفس اللحظة بديت ابحث في النت على الدول اللي تتحدث اللغة الانجليزية .

وجدت الدول التالية أمريكا كندا بريطانيا أستراليا نيوزلندا فقط هذه الدول هي التي يتحدث أهلها اللغة الانجليزية ، هنا بدأت الخيارات ماهي أفضل دولة مناسبة لي ؟

قلت لنفسي أمريكا بعد الإحداث ماتنفع وأخاف بدل ما ادرس في معهد أصير أدرس في جوتناموا!!!! فك الله أسرانا وردهم إلى أهلهم سالمين انه القادر على كل شي .
ووضع السعودي هناك سيء هذا غير الفيزا والوقوف فتره طويلة في الجوازات إلى آخر هذه الأمور .
لذلك حذفت أمريكا من القائمة ثم انتقلت لكندا ولأني ما اعرف شي عن تعاملهم اتصلت بزميل لي توه جاي منها وسألته كيف تعاملهم قالي والله حققوا معي في الجوازات !! قلت ايه هين !! قال والله !! قلت كفيت ووفيت وشلتها من القائمة .

انتقلت لبريطانيا ووجدتها مناسبة لقربها لكن سبحان الله العظيم ما ارتحت قلت أخاف أروح هناك يصير تفجير مثل ما صار تفجير في الأنفاق عندهم ثم أروح فيها من تحقيق وغيره وخاصة أن شعبهم عنصري بحت ، وشلتها من القائمة .

انتقلت لاستراليا ونيوزلندا أنا ذكرتهم مع بعض لأنهم جنب بعض ونفس القوانين تقريبا حتى أن السعودية لها سفارة وحده للدولتين وهي موجودة في استراليا واللي في نيوزلندا ملحقيه والله اعلم .

طيب الحين أروح لاستراليا وإلا نيوزلندا ؟ أقارن بينهم وأشوف الأفضل .
بعد البحث وجدت أن نيوزلندا أفضل من استراليا بالنسبة لي من عدة نواحي
اولاً أن السعودي لايحتاج إلى فيزا إذا راح يجلس اقل من ثلاثة شهور بينما استراليا لازم تفيز حتى لو مررت على مطاراها كترانزيت ولو لساعة وحده !!!!
ثانياً استراليا أيضا مهدده بسبب اشتراكها في الحرب !
يمكن واحد يقول لي ليه هالحساسية أقول أنا ماوراي ناس مصيرهم متعلق فيني وإلا كان استشرتهم وأخذت رأي الأغلبية ، إذن أنا أختار ما ترتاح له نفسي وطالما أن الدولتين متساويتين إذن لازم اطلع الفرق حتى لو كان صغير ولو مافيه إلا هالدولة أبروح ولا راح أفكر بهالأمور ، في النهاية اخترت نيوزلندا واستقريت على هذا الاختيار بعد الاستخارة .

باقي الآن احدد المدينة والمعهد اللي راح أدرس فيها ، ذهبت لموقع دولة نيوزلندا وبديت استعرض المدن وأشوف تفاصيلها واطلع على قوانينها من إلى ما خليت شي وممكن يسأل واحد ويقول ليه مارحت مكتب يصلح لك أمورك وتريح نفسك
أبقولك لسببين أولا أنا ابحث عن معهد مافيه عرب لان هدفي ارفع مستوى اللغة الانجليزية عندي والمكاتب تجمع كل السعوديين في المعاهد اللي متعاقدة معها ووجود العرب ممكن يفسد علي لأني مااقدر ابقعد أسولف معهم .

ثانيا الأعمال اللي اقدر عليها أو أشوفها سهله أحب اعملها بنفسي كتجربة جديدة في حياتي وعلى قول المثل إن لقحت وإلا ماضرها الفحل يعني أن فشلت وماقدرت رحت للمكتب لكن أبحاول أول .

تعرفت على المدن فأول شي عملته تجنبت المدن الكبيرة واللي أكيد العرب يتواجدون فيها بكثرة وممكن تلهيني عن الدراسة ومعيشتها راح تكون أغلى من المدن الصغيرة .
لكن المفاجأة اللي وجدتها أن فصل الشتاء راح يبدأ وقت وصولي المتوقع !!!!
ودرجة الحرارة عندهم تصل إلى الصفر أو اقل أحياناً !!!
والصفر هذا ماقد شفته ولا قد مر علينا اسمع فيه لكن ماشفته !! قعدت أفكر وأتخيل الجو لما يكون درجة الحرارة صفر ! أنا قد سمعت في الأخبار أن في الدولة الفلانيه مات كذا شخص بسبب البرودة !
يالله ياخوفي أتجمد هناك الحين وش السواة اخذ معي فروه وش بيقولون خروف برأس إنسان !! وهل ألفروه أصلا بتنفع مع تحت الصفر !!
تخيلت نفسي طايح جنب الرصيف يابس من البرد وقطعة ثلج صغيره فوق خشمي .
قلت في نفسي أقول والله مايردني البرد أبلبس كذا فنيله صوف وان شاء الله ما أحس بالبرد ، أنا قد رحت للصمان وجلست ثلاثة أيام ما أظن بردهم مثل بردنا الصحراوي اللي يكسر العظم شكل بردهم ناعم لأني أشوفهم في التلفزيون يلبسون خفيف في عز البرد عندهم .

نيوزلندا يا أخوان هي عبارة عن جزيرتين شمالية وجنوبيه الشمالي أدفا من الجنوبية لذلك اخترت الشمالية .
أنا الآن ناوي اختار مدينه صغيره لكن أنا حاط في بالي أن هالمدينه الصغيرة أبيها تكون قريبه من مدينه كبيره لان المطار بيكون فيها وغير كذا اقدر اطلع لها لو بغيت أتمشى أو احتجت لشي ، وطبعا المدن الكبيرة فيها كل شي والصغيرة لا شي .

اخترت مدينة أسمها هاملتون قريبة من مدينه كبيره أسمها أوكلاند يعني تبعد عنها تقريبا أقل من مية كيلو ، وبديت أتفحصها و أدور المعاهد اللي فيها وأشوف أسعارهم وصور الفصول والمدرسين الخ .
تذكرون في البداية لما قلت لكم اني رحت لموقع دولة نيوزلندا هذا الموقع تابع للحكومة وفيها يوضحون لك المعاهد المعتمدة لان هناك معاهد غير معتمدة بسبب نظامهم السيئ او مساحة المعهد او غيره لذلك حرصت اني كل مالقيت معهد أشيك على اسمها من ضمن القائمة هي موجودة وإلا لا .

طلعت ثلاث معاهد في هالمدينه وكتبت رسالة وحده وأرسلتها للمعاهد الثلاثة ، طبعا الرسالة كتبت فيها اني ابغى ادرس عندك من تاريخ كذا ولمدة ثمانية أسابيع طبعا التعامل بالأسبوع مو بالشهر ولا اليوم ، واني قريت الأسعار في موقعكم ولكن أبغى تخفيض ( هذيلي ماعنده يكاسر حتى الأجانب ) لأني ابقعد عندكم ثمانية أسابيع .

وكيف ادفع لكم المبلغ لاني ماعندي بطاقة أتمانية وابغى عائلة أسكن عندهم وأهم شي عندي تكون العائلة تعرف تصلح جريش ههههههه امزح معكم المهم اللي صار
كل المعاهد الثلاثة ردو علي وكلهم عطوني خصم اللي عرفته بعدين ان هالخصم أصلا مخصص للمكاتب اذا جابو لهم طلاب ، وبعض المكاتب تزيد عن السعر الحقيق وتاخذه لنفسها مايخافون الله على العموم بعدين أقولكم كيف .

ونسيت اقول لكم اني سألتهم كم طالب عربي عندكم ، المهم بعد ماجاني الرد انبسطت وتفاجأت أنهم ردو بسرعة !! انا توقعت اقعد أسبوع على مايردون تصدقون ماخذ يوم واحد الا وهم رادين ومعهد رد بعد يومين .

الخصم اللي جاني عشرين في المية يعني في الألف مائتين ريال وبصراحة شي طيب يعني إذا أنا أبدرس ثمانية أسابيع والأسبوع بخمس مية ريال يعني أربعة الآلف ريال أوفر فيها ثمان مية ريال ، وهذا المبلغ كانت المكاتب الأمينة تاخذه منك والغير أمينه يزيدون عن هالمبلغ .
وسبحان الله كل المعاهد فيها سعوديين احيانا احس ان الشعب السعودي أكثر من الشعب الصيني بسبب تواجدهم في كل مكان !
أخترت المعهد اللي موقعه زين وشكله حلو وعدد السعوديين أقل وسعره أقل وراسلتهم وقالو لي اذا ماعندك بطاقة عادي ممكن تعمل لنا حوالة وبالنسبة لطلباتك موجود في موقعنا ملف وهذا رابطه نزله وعب البيانات اللي تبغاها وأرسلها لنا .

نزلت الملف وفيه كل شي حتى العائلة وأعمارهم وهل عندهم أطفال أو لا وهل فيه أكل معين ما تأكله وموعد رحلتك وكم رقمها إلى آخر هالامور .

رحت وحجزت وأخذت بيانات الرحلة ثم عبيت الطلبات في النموذج اللي نزلته منهم وارسلتها لهم ثم رحت للراجحي وحولت المبلغ واخذت صوره من الوصل وارسلتها لهم .
ردو علي وقالو اصبر الحوالة أحيانا تتأخر و أول ماتوصل لنا الحوالة راح نرسل لك ورقة القبول .
بعد يوم ردو علي وقالو الحواله وصلت وهذا خطاب القبول اطبعه وقدمه لموظف الجوازات اذا وصلت نيوزلندا .
وبالنسبة لعائلتك فهذا عنوانها ورقم تلفونهم واسم ام العائله (نسيت اسمها) وابو العائله اسمه كذا والام تشتغل كذا والاب يشتغل كذا ، سبحان الله لو اني ابخطب منهم ماعطوني كل هالتفاصيل .
وبالنسبة للسواق اللي بيستقبلك في المطار أسمه كذا ورقم جواله كذا وهذا رقم مدير المعهد أي مشكله تواجهك اتصل على طول .
حتى انهم ارسلو لي رسمه كروكي للمطار واي بوابه اطلع منها ووين بيكون السواق ، قلت الحمدلله تمت الأمور بكل يسر وسهوله ، طبعت الخطاب والبيانات الثانية وخليتها على جنب الى وقت الرحلة .
بالنسبة للخطوط السعودية ماتوصل لان الخط بعيد ونسيت أقول لكم ان أسوء مافي الرحلة هي طولها يمكن ماتصدقون اذا قلت لكم خط سيري كيف راح يكون !
اولا من السعودية الى هونغ كونغ المده عشر ساعات ثم انتظار ثمان ساعات في المطار ثم من هونغ كونغ الى نيوزلندا عشر ساعات !! تصدقون !! قصمت ظهر

رحت للسوق وشريت المستلزمات من لبس وغيره وركزت على اللبس الشتوي ولكن للاسف الوقت عندنا صيف ولا حصلت ملابس شتويه الا قليل لان اغلب المحلات رجعوها للمستودعات .
قرب موعد الرحلة وانا سفري راح يكون على الطيران الصيني واسمها كاثي باسفيك وانا كنت مختار الطيران الاماراتي وبغيت اتورط لان الطيران الاماراتي يوقف في استراليا بعدين يكمل على نيوزلندا وقانون استراليا يقول لازم تفيز حتى لو انك بتقعد دقيقه في مطارنا والحمد لله اني مارحت عليها وإلا كان رجعوني .

رحلتي راح تقلع يوم الجمعة الساعة الحادي عشر ليلا وكل هاليوم جالس أودع الأهل والأصدقاء وقلت اذا جت الساعة ثمانية طلعت للمطار وجلست على الانترنت ورحت لموقع الكاثي وجلست اتفرج على مطارهم وش فيه وش مافيه ومتى بتوصل رحلتي ومتى بتقلع وهل مطارهم فيه مصلى والا مافيه وسبحان الله اتصل على طيران الكاثي باسفيك وقالو مستر فهد قلت يس قالو ترى رحلتنا بتتأخر قلت الى متى قال يمكن ماتطلع الا الفجر قلت اوكي ثانكيو .
والحمد لله اني جلست في بيتي ولا جلست خمس ساعات في المطار وفيه ناس مساكين جلسوا في المطار ومادرو إلا عقب ما وصلو المطار .
الى ان جت الساعة ثلاث الفجر طلعت للمطار .

أكمل لكم ان شاء الله في الحلقة القادمة

ارجو ان تكونو استمتعتم بالقصة اللي راح الوقت كله وانا في بيتي مابعد طلعت

قصة حلوة

وأنا أتفق معك في النقاط والمعايير الى وضعتها لاختيار المعهد والمدينة لاني كنت مبتعث العام الماضي للولايات المتحدة وسوف اعود بعد أشهر, واتبعت تقريباً نفس اسلوبك.

أجمل مافي قصتك قصة الفروة وانهم بيحسبونك خروف براس انسان (حلووووه)

وأن الشعب السعودي كأنهم الشعب الصيني (اتفق معك وبقوة)

قصه شيقه

ننتظرك تكملها بفارغ الصبر لاتطول علينا

فهد كمل القصه وبطل حركات فاضيه


انا ما اتابع مسلسلآت كله عشان حركه بكره


بعدين فهد قال اللى عندهم اختبارات مالهم قصه بس الناس اللى خلصت اختباراتهم


يعني فرحه انتي روحي لجامعتك واخرجي من القصه


هههههههههههههههههههههههها ي


فهد المره الثانيه اسرد القصه وفكنا من رفع الضغط

يعطيك العافيه فهد

السكبوني بطل حركات النذاله كل شوي تذكرني بالاختبارات

وبعدين فهد قال لتسلية الطلاب والترفيه عنهم

فانا اذاكر ساعتين واجي اتسلى هنا 22 ساعه

السكبوني ترى ماني معصبه عقدتني لازم اكتب العباره ذي في كل موضوع اكتبه

الحلقة الثانية من هذيلي في نيوزلندا

جت الساعة ثلاث الفجر وطلعت للمطار ونسيت أقولكم ان التأخر اللي صار واللي هي خمس ساعات جت من صالحي ، كيف !!
تذكرون اني قلت لكم ان مسار رحلتي فيها انتظار تقريبا ثمان ساعات في مطار هونغ كونغ ؟
تأخير خمس ساعات عوضوها من ساعات الانتظار لان الرحلة من هونغ كونغ الى نيوزلندا رحله مستقلة
وبالتالي صار بدل ما انتظر في المطار ثمان ساعات صارت ثلاث ساعات .

نرجع للمطار ، بعد وصولي للمطار رحت اسحب تذكرة الصعود واحمل عفشي ،
الآن وصلنا للوزن والمعروف ان الوزن المسموح للشخص هو خمسه وعشرين كيلو على ما أذكر ،
وكانت معي حقيبة من الحجم الوسط وحقيبة ثانيه من الحجم الأوسط بعد لكن من النوع اللي ممكن تعلق في الخلف على الظهر وممكن تسحب ومعي أيضا اللاب توب .

حطيت الحقيبة الأولى وخليت اللاب توب وحقيبة الظهر معي على أساس اني أبدخلها الطيارة ولا يحسبونها من ضمن الوزن ، الموظف شاف الحقيبة قالي هاذي
ماتدخل الطيارة ، قلت ليه !! قال حجم الحقيبة المسموح دخلوها الطيارة هي بحجم اللاب توب اللي معك .

قلت طيب هاالشنطه فاضيه مافيها شي وهالانتفاخ اللي تشوفه كله هواء ، قال كيف يعني فاضيه !
قلت شوف بعينك ابضغط عليها وانت تشوف انها فاضيه وفعلا ضغط بايدي على الشنطة ووضحت
انها فاضية مره ، واصلا انا ماحطيت فيها شي الا جكيت وبلوفر وكاميرة فيديو واشياء خفيفة ،
قال لي خلاص قلت الحمدلله ، طبعا هالموظف سعودي يعني ماادري وانا راجع وش بيقولون هناك
يمكن مايوافقون وراح يدفعوني فلوس لان كل كيلو زيادة بمئه وخمسين ريال !!!

يعني لو خمس طعشر كيلو زيادة معناه أبدفع ألف وخمس مئة ريال !!!
أنا سويت كذا لاني الجو حر هنا وفي هونغ كونغ وقلت اخذ معي بعض اللبس الشتوي
علشان قبل ما أوصل لنيوزلندا أصير أغير في الطيارة او أول ما أنزل في المطار .

صليت الفجر في المطار ثم دخلت الطيارة وأقلعت .
ماكان فيني النوم وكنت عامل حسابي وجايب معي كتاب أتسلى فيه وأقطع به الوقت و أذكر انها كنت رواية أسمها " ثمانون عاماً بحثاً عن مخرج "
المهم ما أذكر من كان جنبي ابدا واكيد انه غير مهم والا كان ذكرته ، طبعا انا طالب يكون مقعدي على الممر
علشان لو بغيت أطلع اروح للحمام (أكرمكم الله) او أمشي رجولي أصير اطلع براحتي .

ماكان فيه شي مهم في الطيارة غير اني يوم قصيت التذكرة في السعودية طلبت منهم وجبة مسلم ،
وأنتم تعرفون أن لحوم المشركين مايجوز ناكلها بس لحوم أهل الكتاب اللي هم اليهود والنصارى ،
فكانو يجون لي قبل توزيع الوجبات ويقولون مستر فهد انت طلبت وجبة مسلم أقول ايه ثم يجبون
الوجبة بعدين يوزعون الوجبات بالعربية .

الآن انا في الطيارة والرحله تستغرق عشر ساعات ولو قلنا اني اقلعت الساعة خمسة الفجر
فمعنا هذا راح نوصل الساعة ثلاث العصر بتوقيتنا لكن الحسبة مو كذا لان رحلتنا كانت
بإتجاه شروق الشمس يعني راح يكون وصولي في الليل يعني لما اوصل هناك بيكون عندهم بين المغرب والعشاء !!
يعني صلاة الظهر والعصر بتجيني قبل السعودية !! وقعدت أحسب الوقت الين حسيت انه دخل وقت العصر فقمت ورحت للمظيفه وكانو طفو النور الداخلي للطيارة وقلت لها انا مسلم وابي أصلي ممكن ؟

طبعاً الطاقم كله صيني قالت لي اوكي تفضل قلت ابي غطاء مثل اللي وزعتوه علينا ، هم كانو موزعين علينا غطاء جديد زي اللحاف الخفيف كان لونه عنابي ، قالت ولايهمك واعطتني واحد وفرشتها وسألتها السعودية في أي أتجاه قالت من هنا قلت شكراً .

صليت العصر والظهر وهم وراي ساكتين ههههههههه ماادري ليه سكتو يمكن يحسبون اني محتاج هدوء لانهم كانو يسولفون قبل ما أصلي .

المهم خلصت من الصلاة وقلت لها شكراً على حسن تعاملك ورحت لمقعدي ونمت لي كم ساعة .
وصلنا لمطار هونغ كونغ ونزلنا وبما ان هونغ كونغ ترانزيت بالنسبة لنا ولبعض المسافرين هي
المحطة الأخيرة فنقلونا من صالة القدوم الى صالة المغادرة عن طريق بوابتين بوابة للقادمين ترازنيت
وبوابة للي محطتهم الاخيره هونغ كونغ .

ومرينا على تفتيش بالضبط مثل التفتيش لما توصل لدولة ، دخلت شنطتي واللاب توب في السير
ثم مريت من على الباب ثم دق الجرس !!!!!!!!!
جت وحده معها عصا الكشف ومررته علي ودق جرس العصا على محفظتي !
قالت طلعه قمت طلعت المحفظه وفتحته وشافت الدولارات وزي اللي انحرجت ورجعته بسرعه .
انا ماادري ليه العصا دق جرسه على الدولارات !
طبعا انا ماعندي بطاقة أتمانيه فجايب معي كاش كلها دولارات وخمس مية ريال سعودي .

وفيه نقطه مهمه أبغى أقولها لكم بالنسبة لبطاقة صراف الراجحي ، بطاقة الراجحي تشتغل مثل الفيزا لكن المصيبه نها مالها رقم سري يعني لو أخذها احد ممكن يسحب كل اللي فيها ماعدا سحب فلوس لانه لازم رقم سري، والكلام هذا أخذته من موظف البنك لذلك سحبت كل الرصيد وحطيته في حساب ثاني وخليت بس ثلاثة الآف ريال أحتياط وخذت البطاقه معي .

دخلت الصالة وسبحان الله مطار هونغ كونغ مدينه كاملة ! كبير جداً جداً
فيه كل شي أسواق ومحلات ومطاعم بجميع أنواعها وجلسات وكبائن وأماكن مساج
وأماكن مخصصه لوضع حقيبتك مقابل مبلغ مالي وانترنت .....الخ
مطار ممتع ماتمل منه ، ونسيت أقول لكم اني لما اخذت التذاكر اعطوني معها فيتشر عدد 2
وهي عباره عن تذاكر الاولى يسمح لك بالجلوس في أحد محلات الكوفي وتشرب مجاناً وطبعاً
هذا بسبب الانتظار اللي كان ثمان ساعات والتذكرة الثانيه هي للسكن في فندق في هونغ كونغ
في الرجعة لان الانتظار بيكون يوم كامل

المهم رحت للاستعلامات وسألت عن محل الكوفي وين مكانه حددو لي مكانه وصار مكانه بعيد !
قلت الرحله مابقى عليها الا أقل من ثلاث ساعات وماتسوى أروح لمحل الكوفي علشان كاس شاهي
والا قهوه وفوق هذا كله مابعد صليت المغرب والعشاء .
طيب الحين انا قاعد أهوجس في الصلاة وين أصلي فيه وهالمطار مافيه مكان مناسب للصلاة ،
قمت ادور وادور لي مكان أصلي فيه المغرب والعشاء ، وانا أدور كان فيه ممر خلف المحلات
وهذا الممر فيه كراسي وجلسات وصاد عن الناس ولقيت اثنين جالسين يصلون ! فرحت وقلت
رزقني الله بمكان وبقبله محدده ورحت لهم بسرعة وكانو على نهاية الصلاة ومالحقت عليهم ،
المهم جيتهم وسلمت عليهم وسالتهم من وين قال الاول انا ماليزيا والثاني قال انا من الهند على مااذكر ،
الثاني أستأذن لانه عنده رحله والثاني سألني من وين قلت من السعودية أبتسم لي وقال خذ السجاده صل
عليها أخذتها منه وصليت عليها بعد ماخلصت شكرته واعطيته السجاده وقعدت اسولف معه شوي بعدين
افترقنا ورجعت للبوابه انتظر الرحله .
الشي الملفت للنظر ان المدخنين مخصصين لهم غرف من زجاج يدخلون فيها ويدخنون ويا ويل من يدخن برى الغرفة .

هنا أتوقف وأكمل إن شاء الله في الحلقة القادمة

هلي نجد
فرحه
السكبوني

شكرا على المرور والحلقات ماراح اتأخر في عرضها الا اذا انشغلت

بأنتظاارك ...

الله اللهم طولك يا روووح


من جد بأنتظارك



فروووووحه خلآص الضوء اخضر


خذي راحتك

لا ياشيخ قول والله عطيتني الضوء الأخضر



بإنتظااااااااااارك فهد

فهدددددددنا


قصتك من كم حلقه . . !


<< متابعك ياولد العم

عساك ع القوه

تحيتي

ماادري كم حلقه انا افتح الصفحه واكتب اللي يجي في ذاكرتي علشان كذا تشوفون كل شوي اقول نسيت اقول لكم كذا ......

اليوم ان شاء الله اكتب الحلقة الثالثه

السلام عليكم
واعذروني على التأخر
---------------------

صعدت الطائرة المتجهه بإذن الله الى مدينة اوكلاند ثم أقلعت بنا والوقت كان الساعة 11 تقريباً وطول الرحلة 10 ساعات ، ساعه تنطح ساعة والمصيبه انه مالي ثلاث ساعات منتهي من رحلة طولها عشر ساعات بعد !! بصراحه تعب لكن الشكوى لله .

اول ما اقلعت الطياره قعدت افكر واقول يالله عشر ساعات ثانيه يعني يوم كااااامل وانا في الهواء !!
ليتني رحت لبريطانيا اريح لي كلها اربع ساعات بالكثير وانا واصل بدل هالمرمطه من مطار لمطار ، قلت يا ولد وش يدريك يمكنها خيرة من الله اني رحت لنيوزلندا ولا رحت لبريطانيا مثلا او غيرها .

اللي جنبي في المقعد كانت وحده نيوزلنديه تقريبا عمرها يمكن 55 سنه في بداية الرحلة قعدت تسولف معي وقلتلها اني رايح ادرس انجليزي وماسبق اني شفت نيوزلندا ومن هالكلام ، قالت في أي مدينه راح تدرس قلت لها في هاملتن ، ابتسمت وقالت مدينه صغيره وجميله .
طفو النور ونمت لي كم ساعه وماادري هل كنت أشخر والا لا لأني لما قمت لقيت العجوز قايمه التفتت علي وقالت قود مورنينق هههههههههههه بصراحه انا لما اكون مره تعباااااااان بصراحه أشخر غير كذا عادي بس ترى لي يومين مانمت وحتى هاذي ماتسمى نومه وما ادري انا شخرت والا لا بس شكلها فرحانه اني قمت .
طالعت مع نافذة الطيارة لقيت سواد الليل راح وبدا نور الصبح يطلع والشمس مابعد أشرقت ، اجتهادا مني قلت هذا وقت الفجر ، طلعت ورحت للخلف وصليت الفجر .
رجعت لقيت العجوز تقرأ كتاب قمت أنا طلعت كتابي أكمله باقي منه شوي ويخلص .
ثم وزعوا علينا أوراق الجوازات وعبيتها بمساعدة القاموس الالكتروني .
وصلنا أوكلاند الساعة وحده الظهر بتوقيت أوكلاند يوم الأحد والوقت في السعودية لازال السبت ماوصلهم الأحد !!!
وهنا انا ارتكبت غلطة بسبب الفلسفة الزايده وعلى قول المثل أهل مكة أدرى بشعابها ، الغلطة اني تفلسفت على المعهد وقلت لهم ان رحلتي راح توصل يوم السبت الظهر والصحيح يوم الأحد الظهر !!
كان المفرو ض اني أعطيهم رقم الرحلة وهم يطلعون وقت الوصول من مكتب الخطوط بدلا من اجزم لهم ان الرحلة بتوصل السبت الظهر لأنهم قالوا تأكد قلت متأكد السبت الظهر ، بصراحه انا ماادري كيف اتلخبطت المهم اني غلطت .
ونصيحة لا تتفلسف في شي طالما انها من مهام غيرك .

قبل ما أوصل للتفتيش رحت للبنك وصرفت الف دولار بعدين رحت للجوازات ووقفت مع الناس لحد ماوصل دوري بعدين رحت للموظفة ابتسمت ابتسامة هذيليه وقلت قود افترنون ابتسمت وقالت قود افترنوون وعطيتها الجواز ثم سألتني ليه جاي قلت أدرس انجليزي بعدين طلعت لها ورقة المعهد اللي أرسلوها لي وفيها جميع البيانات .
أخذتها وقامت تسألني طيب أنت ليه تبغى تتعلم انجليزي ؟ قلت لأني اعمل وعلشان اطور نفسي لابد من الانجليزي علشان اقدر اطلع على العلوم الجديده ....الخ .

ختمت على الجواز وقالت تفضل قلت الحمدلله انتهينا من الجوازات الحين باقي التفتيش والله يعيني على هالتفتيش .

قبل ماادخل التفتيش لازم يكون فيه واحد جالس يشيك على ختم الجواز يعني مثل اللي عندنا لم تختم الجواز يصير واحد واقف ياخذ الجواز منك ويتأكد انه فيه ختم .

رحت متجه للتفتيش لقيت واحد جالس على كرسي هو اللي يفحص الختم ، اخذ الجواز مني وقلبه يمين ويسار وفحص الختم ثم سألني معك أكل قلت نو سير ، طبعا يمكن واحد يسأل يقول وش هالسؤال ليه سأل عن الأكل ، الجواب نظام نيوزلندا صاااارم جدا بالنسبة للأكل يعني ممكن تدخل سلاح او مخدرات لكن أكل يا ويلك ويا سواد ليلك ، عندهم ممنوع تدخل أي أكل حتى التمر حتى حبوب النباتات انا سمعت انه ممكن تدخل تمر مثلا بس تبلغ عنه اول ويفحصونه بس ماني متأكد والسبب ماادري يمكن بسبب قربها للهند وبنجلادش وهالدول الغير نظيفة اللي أكلهم يجيب المرض حطوا هالنظام ، لدرجة اني لما كنت في صالة التفتيش كان فيه كلب أعزكم الله يلف على شناط الناس الواقفين واللي يمشون وفجأة وقف الكلب عند شنطة وحده شكلها كورية وقام ينبح انا كنت اعتقد انه مخدرات بعدين لما سألت قالوا لي هذا كلب يكشف الحقائب اللي فيها أكل !!

المهم رديت على الموظف وقلت له (نو سير) بعد ما سألني عن الأكل ثم هل رتبت حقيبتك بنفسك قلت يس سير وكل ما سألني قلت له نو سير أو يس سير فجأه طالعني كذا وكأنه قرفان مني وقال لي : الحين وراك انت من الصبح مشغلني سير سير سير سير ماتشوفني حرمه قدامك !!!!!!!!

انا انصدمت ووووووين هاذي ووووووين الأنوثه كل ملامحها يدل على انها ذكر مو أنثى أولا صوتها خشن ثانيا ماحطت مكياج ابداً ثالثا ماحطت حلق ولا أي شي من هالامور رابعا لابسه مثل رجالهم !!!
قلت لها (ايم سوررري مام) ما انتبهت اعذريني انا مانمت لي أربعة وعشرين ساعة ضحكت هالشيفه وقالت (نو بروبلم) تفضل لقسم التفتيش قلت لها (ثانكيو سير) غلطت مره ثانيه !!! وأنا اللي اسحب شنطتي واسرع قبل ماتحقد علي وتظن اني اقصدها .

التفتيش بعدها على طول مابينهم عشره متر ومقسوم ثلاثة أجزاء على ما أظن اول جزء اللي هو يقابلك على طول واللي هو الأجهزة اللي تحط فيها عفشك والجزء الثاني اللي هو طاولة نحاسية طويلة تحط شنطتك عليها ويفتشونها يدوياً والجزء الثالث اللي هي غرف ماادري وش فيها يمكن للتحقيق والتفتيش الدقيق .

انا ولله الحمد شافني الموظف وطالعني ثم قالي حط عفشك على الجهاز ، بصراحة انبسطت لاني أشوف ناس فاتحين شناطهم وعفشهم كله برى !!

طلعت ثم شفت هالعالم رافعين لافتات بأسماء أشخاص وقعدت أدور اسمي بينهم وللأسف مالقيته !

قمت أهوجس وين السواق اللي بيستقبلني ؟ المشكلة اني في مدينة ثانيه مو في أوكلاند وإلا كان هانت .

لقيت مكاتب لإيجار السيارات رحت وسألتهم هل تعرفون السواق جون ؟ طبعا اسمه ورقمه معي سبق وان أرسل المعهد بياناته لي ، قالوا أسأل اللي واقفين أكيد يعرفونه ، رحت لهم وسألتهم وعرفوه قالوا أمس كان هنا يدور عليك ، وهذا كله بسبب فلسفتي الزايده يوم أقول لهم اني أبوصل السبت الظهر .

قلت معي رقمه ممكن تتصل عليه ؟
قال طيب واتصل عليه وكلمه ثم قال لي خلاص الحين هو جاي في الطريق انتظره ساعة إلا ربع ويكون عندك ، قلت الحمدلله وشكرته .

قلت خلني أطلع برى اشم هواء وكنت لابس قميص نصف كم قمت طلعت من شنطتي جكيت ولبسته فوقه وطلعت وأول ما طلعت صفقني الهواء البارد اللي بغيت أدوخ من البروده ومن غير راي قمت اقول ابيات قلتها يوم اني سمعت ان الوزن محدود والكيلو بمية ريال او بميه وخمسين ريال :

[poem=font="Simplified Arabic,4,darkblue,bold,normal" bkcolor="transparent" bkimage="backgrounds/21.gif" border="groove,6,darkblue" type=2 line=0 align=center use=sp num="0,black"]
البرد وصل وزادت الاوزان =مع ثقل الملابس الشتويه
وكل كيلو بندفع له كم ريال =وبنعيد حساب الميزانيه
لابرد جده ولابرد الدمام =برد يشق الجيوب الانفيه
ان مالبسنا تكسرت العظام =وصارت الرحله علاجيه
اشتري قميص بمية ريال =وادفع وزنها ثلاث مية
مشكله تضيق الخلق والحال =اما اسافر والااجلس هنيه
ابلبس كل البناطيل والقمصان =وخل العرق يصب عليه
والله ماادفع لهم نصف ريال =الين مايصير شتاهم صيفيه[/poem]



كان الوقت هذا وقت كأس العالم وكان فيه شاب بريطاني طالع يدخن برى قمت أسولف معه وعن منتخب بريطانيا وانا انتفض من البرد وهو لابس قميص نصف كم بس كان ينتفض من البرد !!! هذا والوقت الظهر والشمس طالعه اجل في الليل وش بيصير !!

أكمل في الحلقة القادة إن شاء الله

حيــــاكـ يافهد

متى يبي ينتهي ذا المسلسل المكسيكي يافهد

الظاهر لو سافرنا نيو زلندا ورجعنا بيكون المسلسل ماانتصف ههههههههههه

وين شركات الانتاج التلفزيوني عنك ياخوي انت موهبه في مط المسلسلات يعني ساعتين

عرض الزبده كلها 10 دقايق هع هع هع هع

هههههههههههههههههههههه

هالقصه بس فترة الامتحانات يعني تخلص مع الامتحانات

وبعدين لعلمك تراني الحين مختصر مره والا ان كان قلت :

وقبل ان اصعد الطائرة وجدت باقي سيجاره ملقاة على الارض وتسألت ياترى من أين صاحب هذه السجاره ولماذا لم يكملها ههههههه وبعدين حطيت رجلي الاولى على سلم الطائره وكانت مائلة بزاويه تسعين درجه بينما السلم اللي بعده كانت الزاويه تختلف .... ياترى ماهو السبب ههههههههه وشف انت كم طول سلم الطائرة هذا بس لحاله يبيله ساعتين شرح .

بعدين وش يدريك يمكن احد يخطط يسافر لنيوزلندا وتصير مفيده له مو احسن من اقول :

اقلعت الطياره ووصلت ومرني السواق وسكنت ثم درست ورجعت وكانت رحله ممتعه هههههههههه

بعدين رحت للموظفة ابتسمت ابتسامة هذيليه ذي فطست ضحك عليها هي وحقت الحرمه اللي تقولها سير


يالله فهد وربي صرت تطول وإنت ماتكتب

من المفروض يوم تكتب ويوم لا مو تجلس اربع أيام على بال ماتنزل لنا حلقه



الله يعطيك العافيه