محمد المسعودي وعبدالله العير(رحمه الله)

محاوره بين الشاعر محمد المسعودي والشاعر عبدالله العير المطيري

محمد المسعودي
هلا مرحبا واخر وعد مطلع النور = ومن يخلف الميعاد ياطول ليله
ولا يالمطيري كان لك فالوطن دور = ترى العلم يبغى عاقلٍ يرتكيله

عبدالله العير
يدوم البقا والعبد منهي ومامور = ياحلو السلف بين العميل وعميله
تعبنا وهلحينه ركبنا على الكور = واخذنا من الطاغي خطام الاصيله

محمد المسعودي
تبا العذر مير نقول منته بمعذور = وعلمٍ يصيب الرجل ماعنه حيله
يبالك حساب ايام وليال وشهور = ولاتامن الهندي يورط كفيله

عبدالله العير
ولايامحمد ماعلى العلم مذخور = علومٍ على مثلي عريضه طويله
وانا اشوف ليه عالم أتلف وتدور = ولاتفرق البنه من الجنزبيله

محمد المسعودي
عسى البيت دايم فوق مبناه معمور = وراعيه فالميقاف يحمى دخيله
خذ الحذر من فيصل وملفي ومستور = ولاتأمن الحصني ليا رز ذيله

عبدالله العير
ليا سلمت الحمله من العمي والعور = تبا تقطع الظلما بليا دليله
محمد يوصيني وانا احج وازور = ولاشاف خشم الزند عند الفتيله

محمد المسعودي
مابه ملعبه من غير شاعر وجمهور = ولو قلت فيه نقول لك مستحيله
انا اقدرك ماودي اقول مغرور = ترى الوقت باقي والمسافه طويله

عبدالله العير
وعدنا على العله ثلاثين دكتور = ولكن ابو حمى قنع بالمليله
ولاياهذيل أصحابنا طوركم طور = منول تشيلون الحمول الثقيله

محمد المسعودي
انا أبغاك من هذا ومن ذاك مشكور = على شان تصل البارق اللي تخيله
يمين الكرم ماهي مضراه بالسور = ولايقنع الجزار صحن البليله

عبدالله العير
ابو زيد مايصبر على الضيم والجور = يجاهد حياته بالسيوف الصقيله
ولاياولد مسعود منته بمقصور = لكن المذله للنفوس الذليله

محمد المسعودي
بغينا نشيرك مير ماتقبل الشور = واظنك تعود شيخ مالك قبيله
بلادي علمها فوق الاعلام منشور = سعوديه والله عطاها الفضيله

انتهت المحاوره

صح لسان محمد

ورحم الله عبدالله

بيض الله وجهك

صح لسان محمد المسعودي

يعطيك العافية

السلام عليكم ورحمة الله وبركاته.
تسلم اخوي ابو يزيد .
ماتجيب إلا الدرر .
والصراحة أن الشاعر محمد المسعودي علم رغم عدم معرفتي به أو حضوري إحدى حفلاته يقال شاعر مقل رغم أنه شاعر يشار إليه بالبنان ..
.عسى البيت دايم فوق مبناه معمور = وراعيه فالميقاف يحمى دخيله
خذ الحذر من فيصل وملفي ومستور = ولاتأمن الحصني ليا رز ذيله

ورحم الله الشاعر الكبير العير رحمة واسعة وأسكنه فسيح جناته ....

وفقك الله اخوي أبو يزيد ..

الاخ عبادي الهذلي
الاخ ذيب هذيل
الاخ مشعل الهذلي
مروركم اسعدني تقبلو تحياتي