المقنــــاص ....:
السلام عليكم
مشاركة اتمنى ان تنال على بعض استحسانكم .
يا ذكريات القناصه لو حصل للناس نسيان
نذكرك بعد البطا بالقول والا بالكتابه
يوم ان كلا يسوق الذكريات اشكال والوان
ذكرت علمً ينومسني وغيري من مشى به
ياما حلى مع شروق الشمس بادى راس مزبان
السامى اللي عسر ماكل قناصً بدا به
ممشاي له مع توالي ليل قبل الفجر مابان
ولا معي إلا حزامي وأم دقه بالإصابه
كل اعتمادي علي الله ثم صفرا تقضي الشان
شريتها بالغلا يوم الغلا ما أحدً شرا به
قبل اشتريها وأنا عندي لها صندوق مليان
زاد المزاغيف حزمه من يفكوك النشابه
سلاحنا اللي نصونه لو يهوم الوقت ماهان
نحفظ جميله علينا لو يكلفنا زهابه
من حبنا له زحمنا به غلا مدعوج الأعيان
من غيره اللي على جنبي تنوح به ركابه
امن الشحم نكرمه لو كان بطن الذيب جيعان
تلقاه لاوي على الكرسي كما تلوي العصابه
واعقاب اعاقيب واذناب الذياب وروس عقبان
امعلقه تحت مقدمها ولع ماهي لعابه
عادة عرب جيت ابين محتواها قدر الإمكان
فيما يلي من بغا ينشد تكفيه الإجابه
للقنص عشاق تستهوي علومه وين ماكان
هواية القنص قد ولع بها حتى الصحابه
القنص فسحه ومتعه مستحبه عبر الأزمان
الناس تهرج بها مير الصور عيت تشابه
عندي لها فلسفه والفلسفه كله على شان
نكشف مزايا الذي من حبها نمشي عصابه
تلقى هل القنص ناس الله عطاهم صبر وإيمان
من طبعهم مايحبون التسرع والطلابه
الله حباهم بميزه قل ماتوجد في الإنسان
كلاً يقدم خويه كان رب الصيد جابه
وليا مشو ديرة الأجناب ماباتو مسيان
كلاً تحوف الخطر عينه كما دهم الذيابه
وليا استمرو في طرقتهم ومدلول التعب بان
تلقاهم احرص على صحتك من قوم الطبابه
وليا استراحو رمو با الهم والضيقه والاحزان
بعيونهم تصغر الدنيا ولا تسوى ذبابه
كل السوالف عن انواع الطرايد وام نيشان
والمستجدات في انواع الرصاص وكم حسابه
ماسولفوا في الخوي مهما حصل زايد ونقصان
اقلهم يدمح الزله ويرفع من جنابه
اخوان قامو بواجبهم ولو ما كانو اخوان
ادناة واحد يقف ممنون لو تطلب ثيابه
صفوه في الأخلاق والخوة وهم للطيب عنوان
تجمعهم اقدم هوايه والهدف كسر الرتابه
منها تعلمت بان الادمي قافيه سلوان
احيان يعشق طرب واحيان يعشق من رحابه
يالايمي خل عنك اللوم واعرف حق الابدان
المقعد اخطر على الرجال من شلاع نابه
والخوه اللي تجمل مكسبي ماني بندمان
كم حصن بانيه وليا احتجت له مفتوح بابه
من كل ديره معارفنا ولا مخزي وشيطان
نعم الرياجيل من خندف ومن حضرة شبابه
والطِيب ماهو محدد في وطن في كل الأوطان
والقدر في الصدر واللي مايكنه ماحضا به
هذا وتجهيزنا للقنص يبدا شهر نيسان
لامن غدت ريحه البله كما ريح الشذابه
اختار لك ديره فيها الشجر سمره وضهيان
ومن السلم والشقب والنبع غابه سد غابه
وجهه خلا مابها رعيان لا معزا ولا ضان
ماحولك الا اخوياك اللي مخوتهم مهابه
الديره اللي يميزها هواها مثل عروان
والا ممالك " زميّم " يوم دالات الحرابه
عطا الله القارحي
آخر تعديل سلطان السويهري يوم 08-29-2015 في 06:18 PM.
|