من شوامخ فحل الشعر النبطي ( بديوي الوقداني )
يقول بديوي الوقداني رحمه الله :
دنياك هـذي كلهـا هـز قـاووق
ما تعرف الصاحب من اللي معاديك
اكثر كلام الناس بالمكـر والبـوق
يهرج معك واليـا تقفيـت يرميـك
المال دايم صاحبـه مرتفـع فـوق
والقل خايـب لـو ترفعـت يرميـك
عزي لمن دور لها عنـد مخلـوق
إما بخـل ولا منـن يـوم يعطيـك
أوصيك بالطيب إن كـان لـك ذوق
أرمـه وراك ولازم إنـه يلاقـيـك
يا عبد هون كل مطـرود ملحـوق
لا تشتحن لك رب ما هـو مخليـك
اللي جعل لك روح جاعلك مـرزوق
كما تكفل بك مـن الخلـق كافيـك
يعطي وباب الرزق ما هو بمغلـوق
واليا طلبته وانـت محتـاج يعطيـك
الرزق له حسبه وله وقت مطلـوق
وان مت ظلى عنـد قبـرك يناديـك
والموت جايك لو تقع جوف صندوق
دع عنك مابك من حـذر لا يعنيـك
لا تشتغل بالمال والمـال ممحـوق
مـا مالـك إلا مـا تمـده أياديـك
إن كان مالك يافتى ضيـق السـوق
تراه عند الموت مـا هـو منجيـك
الجار والعاني لهم شـرط وحقـوق
والضيف واجب تكرمه يـوم يأتيـك
وإن كان تبغي تأخذ المدح مطبـوق
خلك مشمر دون ضيفـك وعانيـك
صون الامانه واظهر الهرج بصدوق
ولاتعاشر صاحـب البـوق يعديـك
لا تصحب الخاين ولا تأمـن النـوق
وان لاح براق الحيا عـذرت فيـك
والدرب لاتامن ولو كنـت مرفـوق
إلا بحـد فـي يميـنـك يبـاريـك
أترك طريقة كل عاشق ومعشـوق
ترمي بروحك في الشرك ثم يرميـك
والكلب ما يتبعك لو تلبسـه طـوق
وإلا خلاخيل الذهـب مـا يراعيـك
وبالصبر تغلب صاحب العزم يا شوق
والعزم طيب ميـر حـزات يرميـك
وافرح آليا منك عن الشر مـدروق
واحذر صديقك واحذر اللـي يواليـك
هذا كلام الصدق ما هو بمسـروق
وابيات يـا قلبـي بناهـا يسليـك
من هاجس يطمي كما بحر صافوق
أحذر على القلب الشقي يوم يطريـك
يارب تجعلني مـن النـار معتـوق
واجعل ختامي طيبـاً يـوم ألاقيـك
|