][ علموني كيف ياكل قلعتي جندي حقير ][

[grade="00008b ff6347 008000 4b0082"]


السلامـ عليكمـ ،،


علموني ياجماعه جيت ابسأل وأستشير
مـــبتدأ والـــراي مـنكم يعتبر عـــندي خبر

ما كتبت الشعر والله لجل أباقف بالأخير
ياحضر بالصف الأول يا عساني ما حضر

ولا كتبته لجل أبغوي ريم وأغري به عبير
ما ورى طرد العذارى مجد قوم ولا فخر

ما شهر صيت المهلهل قولة انه كان زير
لين مات كليب واعلن حرب ثاره واشتهر

ولاكتبته لجل اخاوي شيخ واشحذ من امير
ينهدر دمي واموت ودم وجهي ما انهدر

نمدح اللي يستحق المدح مانرجي نظير
او بما معنى الحديث بلا ضرار ةلا ضرر

لو يجور الوقت فينا ما نفكر نستجير
شيمت(ن) منا وفينا طبع طبعا تعتبر

مصدر العز اتجاه البوصله طيب الفقير
عزة النفس اتساع الصدر مجمل ما ذكر

تعني انا غير طبعا لازم اكتب شي غير
شي ما جا به مظفر ولا أحمد مطر

كان ماني عن رياض العز وربوعي سفير
جعل شعري للذهاب بلا اياب من السفر

وكان ماني في سفارى دار ابو متعب جدير
جعلني ما اقوم واقف من على الكرسي الحمر

وكان ماني للخليج لسان باليوم العسير
جعل مالي يوم أسند لا حزام ولا ظهر

الوطن مجلس تعاون به قوافلنا تسير
والحقود يموت غل وتنفطر كبده فطر

السعودي من هل البحرين لا صاح النذير
والاماراتي عماني والكويتي من قطر

يصعب الموقف ويسهل في نظر عين الكبير
جابوا الدر الثمين وجبت في كفي بحر

يا أولي الألباب ياأهل العرف يالجمع الغفير
أرشدوني جعل ربي ما يوريكم كدر

علموني كيف ابحيا واشهق بليا زفير
علموني كيف ابطمر سطر واكتب في سطر

هو يصير ان كل منهو قال راي يكون خير
او يصير ان كل مهدي يكون مهدي المنتظر

هو يصير الفيل يلعب باتجاهات الوزير
او يصير الشاه يرجع خطوتين بلا خطر

علموني كيف ياكل قلعتي جندي حقير
ولعبة الشطرنج تقهر من لعبها يابشر

علموني عن خطايه لجل اعاود واستخير
واشرحوا لي كيف مخطي لجل أدنق واعتذر








،[/grade]