المجيريشي و السعيدي قمة الابدااع

عبيدالله المجيريشي

سلام ياقوم(ن) لها بين العرب هيبـه وصيـت
لولا فعـول ايمانهـا ماكـان نسمـع صيتهـا
انته تقول انا وانا وانـا لقيـت اللـي لقيـت
مادام جت لك بنت ليش البنـت مـا سميتهـا

عبدالله السعيـدي
يامرحبا ترحيـب واسـد الـزوم اليـا نويـت
لـو لا الطلـب ماسـن سكينـي ولا حديتهـا
وانته تقول انا وانا وانا هقيـت اللـي هقيـت
تبا تكحل عين بنـت النـاس ميـر اعميتهـا


عبيدالله المجيريشي

هذي خمصطعشر سنه في السوق ماعمرت بيت
واعز حـال اللـي تكنـس بيـت ماهوبيتهـا
يااللي تدور للعشاء ماشي عشـاء ولا مبيـت
لوعندك انجازات من يـوم الثلـوث ابديتهـا

عبدالله السعيـدي


العلم من يمك ينوبك لن زعلت ولـن رضيـت
واهـل المكانـس لا بسميهـا ولا سميتـهـا

انا كتبت بصفحـة التاريـخ وانتـه ماقريـت
والكلمه اللي جـات منكـم ليتنـي ماوحيتهـا
عبيدالله المجيريشي

تضحك لك اختك بالرضاعه وانت عنها مادريت
وانا اعرف انـك لنـت كارههـا ولا حبيتهـا
كم لك سنه وانته تغني ياحجـاب ابـن نحيـت
نار الهواء والشوق بقلـوب العـرب شبيتهـا


عبدالله السعيـدي
انا ماجامل ضحكت الضحاك لن بعت وشريـت
ياللـي تزعـم فـي علـوم كبـار ماسديتهـا
يالذيب ياللي عالـي المرقـاب ليتـك مابديـت
ماكان رجلـك فـي دروب المعسـره عنيتهـا


عبيدالله المجيرشي
والله يالا اذكرك هرج الزور كانـك مانسيـت
حتـى تحـل الواجبـات ان كـان ماحليتـهـا
اعطيتك ام اقرين والسكيـن لكـن ماصطيـت
والمشكله طاحـت وقامـت وانـت ماذكيتهـا
عبدالله السعيـدي

تبقى حسنيـه رئيسـه لكـن ماهـي للكويـت
وانته تعاملها بحسـن ولطـف لـن مريتهـا
ماطلعو الرواد يابو زيـد فـي ظهـر الونيـت
وانته خوي البـدو فالطرقـه تسـوق ونيتهـا
عبيدالله المجيريشي
ابواردي ماترمش اعيوني ليـا منـي رميـت
بالذات لو اني علـى حبـل النفـس حطيتهـا
بغيت اجازي راعي المنطوق لكـن استحيـت
ميقاعها في الوجـه لـو ارفعتهـا وارخيتهـا


عبدالله السعيـدي

انا اشهد انك ياعبيدالله شجيـع اليـا غزيـت
ولا كثيـر النـاس لا مدحـهـا ولا ذميتـهـا

هذيل تفخر كلها وان ضاق بي علـم اعتزيـت
عينين تفرحها يابو سامـي وعيـن ابكيتهـا