قصيدة للشاعر عبدالعزيز بن عبدالله الهذلي

يا سراج أنا يابوك يا سراج أبا أوصيك=واسمع وصاتي يوم أوصيّك وأنهاك

اِسمع كلام اللي يحبّك ويغليك=يسهر ويتعب في محبتك ورضاك

يا سراج أنا يابوك لي طمعة فيك=خلك على ظني عسى الله ياقاك

أول وصاتي طيع ربٍّ مسويّك=اللي خلقك من العدم لين سوّاك

وأبوك وأمّك طيعهم بأمر واليك=والمصطفى يوصيك في أمك وآباك

رحّب بضيفك يوم يقبل مناصيك=بالضيف رحْب يافتى يوم ينصاك

وقدم له الكَرْمَه عسى الله يعطيك=وقدم لضيفك ما تحوشه بيمناك

والجار جارك كرّمه ثم عانيك=وادمح لجارك زلّته لو تحدّاك

واحذر رفيقٍ لك يصادق معاديك=من صادق العدوان واحد من عداك

صديقك اللي يوم تغليه يغليك=يفرح ليا جيته وتفرح ليا جاك

ما هو رفيق اللي ليا أقفيت يرميك=صديق في وجهك عدّو يتقفاك

واِحذر من النمّام من حيث ياتيك=واحذر من النمّام حِذْراك حِذراك

وختامها نطلب من الله ينجيك=ويكتب لك التوفيق في كل ممشاك

بيض الله وجهك اخوي الفارس حزين الطلعة على الموضوع الجميل الذي يحكي عن قصيدة لاحد الشعراء الهذلان الذين نفتخر بهم .

تقبلوا تحياتي....