يا أمة سخرت من صمتها الأمم ........؟؟؟

والله قهــــــر

قالوا كتبت وقلت وش عاد نكتب
ماعاد به ياهل الشعر شي ينقال

الشعر لا يطرب ولا عاد يِعجب
ما يطرب إلا الفعل من كف الأبطال

وش فايدة نكتب ونصرخ ونغضب
مادام ما به فعل ماهاب من عال

كم للأَبيّ الحُر يِنكر ويَشجب
كثر الظلايم للأرامل والأطفال

القيل ما يِشفي ولا هوب يِرعِب
إلا مع توحيد الاعمال ياسال

دام العرب في ضعف وش عاد نَشعَب
حتى القصيد يصير ما عاد له بال

وش لون ننخى ونتفاخر ونطلب
دام القلوب اشتات والكل في حال

كلٍ على رايه يِطنّب ويِسهب
متفرقين وكل منّا على فال

والله قَهَر ياصاح نِضرب ونِسلب
من حَفنَه أوغاد وخنازير وثعال

ياسال لا تسأل ترى القلب مُتعَب
هلّل وسبّح واترك الحال للوال

اليوم مالك غير تدعي وتطلب
القادر الجبار والهادي الدال

لين الزمن والوقت والوضع يقلب
كود النصر يظهر على كف الأشبال

موت الجسد ياصاح ماهوب يحسب
الموت من موت الأماني والآمال



شعر الامير((خالد بن سعود الكبير))