فتل ونقض للشاعر عبدالله المسعودي

الجبرتي:

ان لزمك الليل عندي بذبح الكبش النطوح =بعدما جاني صحيبي طاح راس الكبش طاح
انته مايبري جروح غير مبرين الجروح= والعلامه في حناح الصقر خفاق الجناح

المسعودي:

يالله انك تجعل المذبوح فده للذبوح =يمكن الكبش لا شافك يموت بلا سلاح
الدواء يبري جروحي وانت جرحك مايروح =كلما يلمسك فيه الثوب لجّيت الصياح

مستور العصيمي:

نهار انّا تواعدنا على وضح النقا المجرود = بهيبتنا كسرنا القوم قبل انّا نحاربها

المسعودي:

نهارك صادفه رمضا وحدتك الليالي السود =وحنا خابرين اسود سمحه من ثعالبها

صياف الحربي:

قرب الاصباح والبابور راسي ماتحرك=ودي أدفه مع الاطلس على بحر الهنودي

عبدالله المسعودي:

إرس يا بابور وسط البحر لله درك=والهنود يشيلهم بابورهم وانته سعودي

محمد بن تويم :

ولا يا الهذيلي قر سوق الشرا والباع=ومعروف ميزانك ومعروف ميزانـي

عبدالله المسعودي:

ولا يا العتيبي ماش طمعه ورى طماع=ولو كل واحد قال انا احسن من الثاني

مطلق الثبيتي :

يا عبدالله تهرج كان دنيا الملعبـه دنيـاك=ونا وانته على درب العرب والمشي بالراحه

عبدالله المسعودي:

ظروف الوقت تبعدني وتدنيني بغير رضاك=لكنّ الذيب بانيابه فزع والصقر بجناحـه

جار الله السواط:

عسى ربعك هذيل يصيبها الرقاف والجلاد=دليلتها عوّر دويرةٍ مـن فـوق دويـره

عبدالله المسعودي:

هذيل اهل البلد ولا انت مالك فا البلاد بلاد=يا حوت من البحر دويرةٍ من فوق دويره

محمد الجبرتي :

يا عيون العود يااللي طار عنك النوم برى=طار عنك النوم وانتي يا عيون الورع باتي

عبدالله المسعودي:

يا جماعة خير قولو للقحم روح وتمرى=والله اني لسهره مثل النجوم السارياتي

محمد بن تويم :

انا مامور يقلون اعلن الترحيب بأول قاف=بخفة دم وبنفسٍ سوات السكـر الحالـي

عبدالله المسعودي:

عليك الأمر نافذ من قديم الوقت والعراف=تذكرني كلامٍ كان ما يطري علـى بالـي

مستور العصيمي:

يا ذيب يلي تجر عواك عنا فا الخفا منت ذيب=من جوع ولا طبيعه فيك يا سرحان تضرابها

عبدالله المسعودي:

يا سامع الصوت كيف بتسمعه لولاه منكم قريـب=الموت من روحك اقرب من عصاك اللي تعصى بها

صياف الحربي:

عسى قصتك خير وعنك حبل الشر مقطوع=نويت اكسيك ثوب ابيض وغاشيه البياضي

عبدالله المسعودي:

بتكسيني منين الله يجيب الخير فا اسبوع=وراسك فوقه القمرا ورجلك فا الرماضي

مستور العصيمي:

يا طير لك مخلب وريشٍ وجنحان=ودي بقتلك مير قتلـك حرامـي

عبدالله المسعودي:

الطير جايك دونه الذيب سرحان=والذيب ماهو صيده لكل رامـي

ثواب الجعيد:

ان كان شفت الطق جاء فالعود=تبى تصّيح فضحى عالي
ترى عميلك ما يحب الزود=مير اخلتف معناك ياخالي

عبدالله المسعودي:

تبا تقوّم لك قلوب رقود=إلهم سنه مدري يورالي
مضهود ياراس الجمل مضهود=تبا السفر وحمولك اثقالي

السواط:

معي سيف ابو حدين والوقت وراك=لياليك و ايامك تراها خطيره
ولا يا بديوي لم ضانك ومعزاك=وجودك على طعم اللبن والمضيره

عبدالله المسعودي:

انا اقول لو سيفك يعشيك عشاك=ماتمرح جياع الا الجيوب الفقيره
انا ارعى الغنم مير انت من عاد يرعاك=ليا جتك عمسات الليالي مغيره

حامد القثامي العتيبي:

خطبنا لك خطيبه وش تورا يالغلام حمود=اوصفها لياوصفتها عاهر وسعليه
اوصفها وصايفها زبيبه في ذنبها عود=تبا غمر سوات الصوم ضلع في اليمانيه

عبدالله المسعودي:

علاك تصك ملكتها وتثبت عقدها بشهود=وانا والله لطير بها سما والارض مرضيه
تبي تغلي علانا سلعة في سعرها محدود=كما منهو فرحله نص يوم بثوب عارية

السواط:

إليا نويت تحط مالك لايروح الا في مـال=كم واحد مٍن شين حظه راح يقتل وانقتل
إللي يبا درب الجميل يكون عنده وسع بال=ان كان ماصدقت علمي روح للعراف أسل

عبدالله المسعودي:

أنا سواة الصيرفي هات الهلل وأخذ الريال=تحمد الله يوم تاخذلـك ريـالٍ فـي هلـل
وان دامت الدنيا طويلة شيبت روس الرجال=كم واحدٍ ينقز لها عشقـه ويتركهـا ملـل

سلمان بارك الله فيك

ماشاء الله انتقاء ولا اروع والمسعودي يرد في كل كلمة ماشاء الله

الله يرحمه ويسكنه الجنة

سلمت يا سلمان احسنت الاختيار

والله يرحم عبدالله ويرحم جميع اموات المسلمين

تحياتي

شعراء عمالقه..

ولله در المسعودي..

شاعر من طراز مختلف..
.
.
شكرا ياسلمان..
.
.
احترامي

محمد الجبرتي :



يا عيون العود يااللي طار عنك النوم برى=طار عنك النوم وانتي يا عيون الورع باتي

الله يرحمك يالجبرتي

	المشاركة الأصلية كتبت بواسطة شباب

	سلمان بارك الله فيك ماشاء الله انتقاء ولا اروع والمسعودي يرد في كل كلمة ماشاء الله الله يرحمه ويسكنه الجنة

الله يبارك فيك ياشباب

شرفت بمرورك

والله يرحم المسعودي

ويسكنه جنّة الفردوس الاعلى

	المشاركة الأصلية كتبت بواسطة قرناس بني ياس

	سلمت يا سلمان احسنت الاختيار والله يرحم عبدالله ويرحم جميع اموات المسلمين تحياتي

الله يسلمك ياقرناس

شرفت بمرورك


والله يرحم عبدالله المسعودي

	المشاركة الأصلية كتبت بواسطة عبدالرحمن مساعد

	شعراء عمالقه.. ولله در المسعودي.. شاعر من طراز مختلف.. . . شكرا ياسلمان.. . . احترامي

العفو يابو مساعد


حياك الله وحياالله مرورك


نعم عبد الله المسعودي

من طراز مختلف

ومدرسه شعريه


الله يرحمه

	المشاركة الأصلية كتبت بواسطة لورانس العرب

	محمد الجبرتي : يا عيون العود يااللي طار عنك النوم برى=طار عنك النوم وانتي يا عيون الورع باتي الله يرحمك يالجبرتي

المسعودي والجبرتي

ثنائي لا يتكرر

الله يرحمهم ويغفرلهم


مشكور يا لورانس شرفت بمرورك

رحم الله شاعر هذيل


انتقاء رائع ياسلمان

بيض الله وجهك

وألف شكر لك

رحم الله مدرسة شعر المحاوره وعميد شعراء المحاوره وملك المحاوره

فكل الألقاب يستحقها كيف لا وهو من طور شعر المحاوره وكل شعراء المحاوره تلاميذ في مدرسته لله دره من شاعر

سلمان الندوي مبدع ومتألق فكن دوماً كذالك

أعلى تقييم للموضوع وصااحبه