ياهل الجيب المجهّـز وناوين الشــمال

الأحبة الغالين

السلام عليكم ورحمة الله وبركاته

لعيونكم الغالية وأذواقكم العالية

[poem=font="simplified arabic,6,#00008b,normal,normal" bkcolor="" bkimage="" border="none,1," type=2 line=0 align=center use=ex num="0,"]
ياهل الجيب المجهز وناوين الشمال=وقفوا لو خذت من وقتكم شيٍ قليل
ريضوا لي لين أجيب العمامه والعقال=والفراش وبعض الأغراض للدرب الطويل
للديار اللي سقتها مراويح الخيال=علها من بارق الوسم سيلٍ عقب سيل
ديرةٍ ربي كساها جمالٍ في جمال=لين صارت تشرح الصدر وتداوي العليل
ودي اقضي عدة أيام مع عدة ليال=في فضاها واهتني بالمساء عقب المقيل
علّي استرجع شبابي ولو قالوا محال=عاقد الأمال في واحدٍ ماهو بخيل
كلما حاولت قالوا هدف صعب المنال=قلت فعلاً صعب لكن ماهو مستحيل
بين شي من الحقيقه وشي من الخيال=ينبعث في النفس ذاك الشعور اللي جميل
ماتشوف العشب يطلع من احضان الرمال=ويابس الاغصان تخضرّ وتعود تميل
إبتعد عن زحمة الناس تلقالك مجال=وإترك الدنيا لأهلها ودوّر لك بديل
لاتفكر في تجاره ولافي راس مال=وانت لين اليوم شايب ولا عندك حصيل
كل شيٍ فات والعمر باقي لايزال=لاتضيّع باقي العمر في الشيٍ الهزيل
ضاعت اعمار اكثر الناس في جمع الريال=يتعب الرجال حتى يفاجيه الرحيل
التعب والكد لأم العيال وللعيال=وآخر المشوار من يعترف لك بالجميل
ادري إن اهلك لهم حق مافيها جدال=وانت ماقصرت وفّيت في وزنٍ وكيل
مير نفسك ناسي حقوقها يبن الحلال=انت مايرتاح بالك بيوم ولابليل
تدّرج مثل المحاله تلاحيها الحبال=في عذاب وتسقي الناس عذبٍ سلسبيل
قوم وانظر في المرايه وسل نفسك سؤال=ويش بقا بالعمر للكد والحمل الثقيل
والله إن الصوره ابلغ جواب من المقال=الزمن شاهد على الحال والواقع دليل[/poem]