قصيده في شاعر الوطن

بسم الله الرحمن الرحيم
هذي قصيده في شاعر الوطن سعود القت,كتبها الشاعر عبد الرحمن الميزاني,نترككم مع القصيدة,والتي عنونتها بعنوان
"انتـم بنـي شـلاح قـومٍ بواتيـر"

تفاخرو يامطير في شاعر مطيـر
الي على الشعـار فـاز بجـداره
جاب اللقب من بين كل الشواعيـر
واسم المطيري سجلـه بالصـداره
شاعر وطن ماهوب شاعر دنانيـر
ودايم على الطولات يرفع شعـاره
والمركز الاول نصيبـه ولاغيـر
مكتـوب بالدفتـر وبالاستـمـاره
وقصايده تطرب جميع الجماهيـر
ماهو من الي ياخـذون استعـاره
ياسعود بن رشيد مسيـت بالخيـر
يالنمر يالـي مـن سلالـة نمـاره
يابن الرجال النادريـن المناعيـر
اهـل الفعـول الطيبـه والوقـاره
انتـم بنـي شـلاح قـومٍ بواتيـر
عبـادلٍ فيكـم شمـوخ وسطـاره
وفيكم طناخة راس من دون تقصير
رجالكـم دايـم تقـادح شــراره
ولاجات للفزعه بوقـت المقاديـر
العبدلـي عشـاه يعطيـه جـاره
والا القصايـد واردات ومصاديـر
وابو عمر على العلا شـب نـاره
من منطقة جيزان جتنـا التباشيـر
لبَسك ابن ناصر وشاح الصـداره
اخذتها من دون رشـوه وتزويـر
مصدقه من عنـد اميـر الامـاره
وجيت بمطار العاصمه حزة عصير
حول بك الطيـار داخـل مطـاره
وقدامك المطران صفـو طوابيـر
قدام ضبط الوقت يعطـي اشـاره
يستقبلونـك بالـدلال المباهـيـر
وكلٍ فتـح بيتـه وجهـز وجـاره
تستاهل التكريـم ياشاعـر مطيـر
يالي على الشعار فـزت بجـداره