محاوره مع الشاعر الخلوق محفوظ أبو نايف !!!!!

إحدى المحاورات القديمه التي نشرت في مجلة ((إقرأ ))
أتمنى ان تجد صداها لديكم ..
وهي بيني وبين الشاعرالخلوق/ محفوظ ابو نايف/
(عوض الطلحي) إن لم تخنّي الذاكره
أتمنى من يعرف عنه شيء أن يبلغه سلامي وتقديري
وماهذه المحاوره التي أطرحها هنا .
إلا بعضاً من الوفاء لهذا الشاعر الذي أحترمه
اترككم مع المحاوره
.
.
.
.

عبيدالله العرابي

من هجوسِ جديده مستعده جيت أسلم ولـي مقصـد ونيـه
وين(محفوظ أبو نايف) نقله بالوصايف وهو قصّاص أثاري


حددوا لي معه موعد وقولوا له على ذمتـه يكتـب وصيـه
له معي سالفه محكم غطاها تنكشف لاحضر كاتب وقـاري

محفوظ أبونايف

يالعرابي تخيّر لاتحيّر وابـو نايـف يبادلـك التحيّـه
الدروب السليمه مستقيمه وانت لك رأي والحل اخيتاري


المعاني بدا فيها وفيها علها يالخوي عـن حسـن نيّـه
والسوالف نناقشها وندرسها على علم باسلوبٍ حضاري

عبيدالله العرابي

صاحبي ليش عجل وتحسب إني جيت لجل أظلم الروح البريه
ماغوينا الدروب وندري إن الثوب ضافيه يستر كل عـاري



والمعاني يابونايف ظرايف مثل ماأقفيت وأخفيـت الهويـه
والسبب لو نضحلي ماأتضحلي والبقيه تجي والليـل سـاري

محفوظ أبونايف

المعاني لها مدلول ثاني حسب ماشفت والنيّه مطيّه
والتجاره تبا فن وشطاره سلعةً بين بيّاعٍ وشاري


من يوفّي علومه مايقفّي والوفي يعرف الناس الوفيّه
والنشاما يعرفون النشاما من قديم الزمن والكل داري

عبيدالله العرابي

الهزايل تجي بعد السماني وآنت ماجيت فـي قـدم السريـه
وآنت جالس تذكّر وش حصلّك ماوصلّك على معناك طاري


الوفا شي ماثـل حـي لاتكلـف ولاتحسـب النيـه رديـه
إحسب حساب ممشانا وحذرى لاتوانا ترى ليلـك غـداري

محفوظ ابونايف

انتبه يا عبيد الله لك الله ما بنا نشعل الدنيا وريّه
لاتلقى الدعاوي بالدعاوي مانبا نخبط اطراف الشجاري


كان ودك تعلّم لا تكلّم قبل ما تدرس اطراف القضيّه
لكن ان قلت كلا مالك الا قصّة الصقر مع طير الحباري

عبيدالله العرابي

ماتعبنا على شان المعامل بالمجامـل وشـوف النـار حيـه
والسما تلتقي بالارض طول وعرض والسيل تالي ليل جاري


القضيـه درسناهـا وقسناهـا تصبّـر وتاخذهـا هـديـه
شي ماتستطيعه لاتطيعه وأكثر أحلامك أضغـاث وهـذاري

محفوظ ابونايف

لوقعدنا حسبنا ماحزبنا واعتلينا على وسق المطيّه
المساري تبي وافي سنافي ما تردّه طويلات المساري


كان عقلك يدلّك فانت خلّك بين ميسان واطراف الحويّه
لاتعدّى المرابي يالعرابي وان تعديت تاكلك الضواري

عبيدالله العرابي

ماأخبر إني جبرتك وإستشرتك والجبل فوق والرقه وطيه
بعض الأشجار ولعة نار مهما صار ما تنبت أوراق وثماري


لابديت أنت ولا بنت قلي يمكن الله عطى الميـت عطيـه
مأنت معيار للشعار والأيام في إرشيفها شـري وخـاري

محفوظ ابونايف

المعاني سببها من عربها كل واحد يقول انّه شفيّه
اكثر الهرج محروفه حروفه يحسب الببغان انه كناري



راح وقت الشكاله والجزاله ما بقى من مطاليقه بقيّه
جاك وقت الحداثه والغـثاثه يحسبون المعاني لعب اتاري

عبيدالله العرابي

لاتفصّح وتسقط في هشيمه خل ريمـه وفرسـان العبيـه
لاتغش المدارس وأنت حارس لأنت فارس ولا قايد قراري


لايكون أنت من باقي مطاليقه ونصبح على باب الخطيـه
عوّذ إبليس يارجال والمحتال يبدي على وجهـه مـواري

محفوظ ابونايف

استمع في جوابي يالعرابي انت صاحب ولك عندي جزيّه
من يجيب الهزيله في حصيله ينتهي ياعبيد الله حذاري


انتهينا على شيمه وقيمه في دروب الوفاء نمشي سويّه
نختم القاف والمعنا جمعنا قبل يطري على صاحبك طاري

الله أكبر


هذي محوارة و إلا فلسفة وإلا دروس في فن المحاورة


الله أكبر


هذي أكبر من المحاورة

ابداع ابداع ابداع

بصراحة محاورة مجنونة هذي أقل ما أقدر أسميها

يالعرابي بيض الله وجهك على هالمحاورة انت و عوض الطلحي

ليتك تقتص أثر هذا العملاق لتأتينا بنبأ

والكلام موجه للجميع
من يعرف هذا العملاق (( عوض الطلحي ))
فليأتي بخبر



مشكور يالعرابي


وتقبل مروري المتواضع يا عملاق

السلام عليكم ورحمة الله وبركاته.

ممتعة ممتعة جدا هذه المحاورة ..
صح لسانك ولاهنت الشاعر العلم عبيد الله العرابي ..

وبخصوص الشاعر أبو محفوظ ربما رايته من قبل في قناة الصحراء ....وأعتقد إسمه محفوظ أبو نايف ..وألقى قصيدة مميزة ..

نقديري..

شاعرنا القدير / عبيدالله العرابي


محاورة قمّة ودرس من دروس الشعر تقدمه لنا


صح لسانك ولسان أبو نايف مدد بلا عدد


ونسأل الله أن يكون بخير

وأعتقد والله أعلم أن هناك صلة قرابة تربطه بالشاعر الكبير عبدالله الطلحي


ننتظر التوضيح من أخواننا الطلحيين في المنتدى

محاورة قمة و إبداع
و الشعر يفخر بكما

و أنا كنت معاكم في ذاك المنتدى
كانت فيه محاورات كبيرة و كثيرة و عندي بعضها على أوراق لك و باقي الشعار
عساني ألقاها

لكن مدري وش صار على المنتدى ؟

أخوك / نايف