سالفة الرجال إلي إدعوا عليه بسرقة البندق

السلام عليكم ورحمة الله وبركاته

هذي سالفة قديمه صارت لواحد شد من عند ربعه وصار عليه مشكله وتخلوا عنه ربعه

المهم

يقلكم شد رجال من ديرته ونزل جار في ديره ثانيه والرجال هذه فيه خير وراعي علوم طيبه كرم

وشجاعه وعرف قبايل , ويوم شافوا أهل الديره علوم الرجال غانمه صاروا كل ليله يجون عنده

يتونسون ويتقهون وصار بيته مزار للكل,

وبعد فتره جا الديره هذي واحد من جماعته ولكنه أفضل منه بكثير من جميع النواحي , ومالوا أهل

الديره للضيف الجديد يوم عرفه إنه رجال وفيه خير أطيب من رفيقه إلي قبله,

المهم الحسد والشيطان دخلوا في الرجال ألأول يوم شاف الناس تفرقوا عنه وراحوا جهة رفيقه

الجديد,

قام دبر له مكيده وإنتهز فرصه وغره للقبيله وسرق من عندهم بندق وخباها عنهم,

فقد راعي البندق سلاحه ولا يدري من سرقه ولا على مين يدعي, ولايقدر يدعي على أحد بين المهم

راح للرجال الأول وقاله والله يافلان انا مسروق سلاحي ولا أدري وش أسوي.

قاله لايكون مدعي علي ؟

قاله لا والله ابد بس كيف اتصرف وكيف أكتشف من سرق سلاحي؟؟

قاله والله يابن الحلال أنا رجال ساكن عندكم لي مده تخبر إن راح لكم شي ؟؟

قاله لا والله ماخبرت راح لنا شي ولا فقدنا شي

قاله شف من حاف الديره أمس وأسأل الرعيان وإذا فيه أحد مر الديره بهاليومين , يحرضه بطريقه

غير مباشره على رفيقه الجديد, بدون مايصرح بإسمه,

المهم عرف الرجال إلي إنسرق سلاحه المقصد, وقاله بس شوف لا تروح تدعي على واحد ومامعك

بينه تنشب, وإلا إذا طلبوا الرجاجيل منك البينه قل أنا أقبل منه يمين جزم ويمين خبر

طبعا يمين جزم يحلفها المدعى عليه , ويمين الخبر يحلفها ناس من جماعته إنهم مايخبرون رفيقهم

سروق,,

إدعى الرجال على الضيف الجديد وحكموا عليه بيمين جزم وخبر وقبلها الرجال,

المهم راح لربعه يبغى منهم كم نفر يحلفون معه يمين خبر<<<< يمين الخبر هذي يعني مثل التزكيه

يوم وصل ديرته لاقوه ربعه ويسألونه عن حاله قالهم والله ابشركم بخير وماعلى خلاف لقيت ناس

طيبين أهل كرم وووو, ولكن حصل لي مشكله وإحتكمت معهم للشيوخ وإنحكم عي بيمين جزم

ويمين خب , وأبغى منكم ناس يروحون معي يحلفون, قالو له ربعه بسم الله الرحمن الرحيم الحين

أنت شاد من بين ربعك ونازل عند الناس وتاخذ معهم مذهب وتعطي لوحدك وتاركنا وراك ويوم إنحديت

ذكرتنا, رح فحالك الله يصلحك ألعلم إلي مانحظر بأوله مانبي من تاليه شي,,

حاول فيهم رفضوا مررره

المهم وهو يرجع لأخصامه ويقلهم ابشركم انا رحت لربعي وطلبت منهم الشي إلي حكمتم به وقالوا

نجيكم إن شاء الله إذا هل الهلال الشهر المقبل

وقبلها بثلاث ايام وهو يرجع لربعه ويقابلونه وهم ينشدونه وش سوى في الدعوه إلي عليه,, قال

ابشركم إنتهت المشكله والبندق لقيوا من سرقها والحمد لله , والشهر هذا شيخ القبيله مجوز ولده

ونا رايح له برفد وابغى ناس يروحون معي منكم, قالوا له إبشر نروح معك ( فيها رز ولحم وش له مايروحون)

وعلى الوعد وهو جايهم بجماعته وأخصامه مستقبلينهم ويوم قرب من البيوت وقف ربعه وقالهم

إسمعوا يارجاجيل , إحنا قالطين على قبيله ورجاجيل وسط محفل وفيه من القبايل ناس وجد

يبيحظرون, ولاحنا بداخلين على غمه , نبغى معراض بالسلاح وردح وابغى شاعر منكم يبنيله ردحه

وحنا نردد وراه, قالوا والله يابن الحلال مافيه شاعر فينا افضل منك قل أنت الردحه وحنا نردد وراك

تهرب منها وحاول وهم مصرين

المهم يوم قبل ووصل للرجاجيل وهو يقول


والله يمنا رجلها في الما .... وراسها متعدي السما

تاخذ عبيد الله من الطلابه ..وإن كان صادق تخرجه بها

يالبندقه مالي بها علما ... ولا خطت ساقي لها قدما

ولا لزم كفي مع اللزامه ... ولا أدري وين أرضا غدت بها

وجماعته يرددون ولا إنتبهو إلا وهم حلفوا اليمين بدون رضاهم , قالو يافلان أنت حلفتنا, قال إيه

حلفتكم ياسويدين الوجيه, يوم انا صاكين علي الرجال تخليتم ويوم فيها لحم ورز جاين تعادون

وأخصامه يعطونه البيضاء ويسلم من الدعوه

وسلاااااامتكم

سالم وغانم يابو جهاد

سالفه معبره فيها من الحكم والحنكه الشي الكثير

وهذا اللي حاصل اليوم معاد فيه ماقف حميه إلا على الصحون >> غير ها ما عندك أحد

سجل إعجابي

تحيه طيبه لشخصك الفاضل ،،،،

القصة تطرقت عدة مواضيع قيمه ومنها ان المرجله والكرم ترفع الرجال بين القبايل حتى لو ما يعرفونه
وثانية يبين الراوي بأس قهر الرجال لبعضهم اللي تعوذ منه الرسول الكريم عليه افظل صلاة وزكى تسليم
وثالثه ان من حفر حفرة لأخيه وقع فيها
الظلم ظلمات
تسلم اخي الكريم على هذا الموضوع الجميل والمفيد
تقبل مروري ولك تحياتي

يعطيك العافيه اخوي رزق الله

علمك غانم ..... وعلومك غانمه

يسلم بنانك يا رزق الله على ها القصة الاثريةذات المعاني الاصيلة والمليئة بعلوم الرجال الدهاة

ولك احترامي

علم غانم يا أأبو جهاااد

والقصه رااائعه والله يكفينا شر الغيره والحسد اللي توصل للكراهيه والإنتقاام

سالم وغانم يابو جهاد

	المشاركة الأصلية كتبت بواسطة صالح الكعبي

	سالم وغانم يابو جهاد سالفه معبره فيها من الحكم والحنكه الشي الكثير وهذا اللي حاصل اليوم معاد فيه ماقف حميه إلا على الصحون >> غير ها ما عندك أحد سجل إعجابي تحيه طيبه لشخصك الفاضل ،،،،

حياك الله يابو خلود

تشرفت بمرورك الكريم

هذي العلوم الغانمه والله
تسلم أخي الكريم على هذا الطرح الراقي
واتنمنى أن تتكرر هذه القصص التي تذكر الأبناء ماكان عليه
ابائهم وأجدادهم من العوايد والسلوم الحميدة

ومن هنا نطالب الأخ الكريم رزق الله الزيداني وكل من لديه مثل هذه القصص الرائعة
أن لايبخل بها علينا وقسم التراث الشعبي مفتوح للجميع

تقبل شكري وإعجابي أخوي رزق الله
وتقييم أعلى لشخصك الكريم ولموضوع الرائع

وانت سالم وغانم
بيض الله وجهك

	المشاركة الأصلية كتبت بواسطة القمر

	القصة تطرقت عدة مواضيع قيمه ومنها ان المرجله والكرم ترفع الرجال بين القبايل حتى لو ما يعرفونه وثانية يبين الراوي بأس قهر الرجال لبعضهم اللي تعوذ منه الرسول الكريم عليه افظل صلاة وزكى تسليم وثالثه ان من حفر حفرة لأخيه وقع فيها الظلم ظلمات تسلم اخي الكريم على هذا الموضوع الجميل والمفيد تقبل مروري ولك تحياتي

حياك الله يالطيبه

بارك الله فيك ورحم والديك

تشرفت بمرورك