حان الرحيل

السلام عليكم ورحمة الله وبركاته


( حان الرحيل )


حان الرحيل ولابقى غير يومين
يومين ونفارق جميع القرابه


ونفارق الديره وكل المحبين
وجار وصديقٍ لي عزيزٍ جنابه


وحارت دموع العين في محجر العين
والقلب ممابه تزايد صوابه


من واحدٍ ينشد يابويه على وين
وانت الوحيد اللي صعيبٍ غيابه


كلمه نطقها كنها حد سكين
اصعب سؤال وصعب حتى جوابه


عنه اخفي إشناط السفر مابي تبين
وهو يناظر في ذهول وغرابه


كنه يقول ان البعد يايبه شين
وموحش كما ليلٍ تعاوى ذيابه


حاولت اسلي خاطره قلت ياالزين
خلك صبور وفيك عزم وذرابه


انته من هذيل الرجال العزيزين
وأعز اسمٍ فـ الزمن يعتزابه


وعندك خوالك والعمام العريبين
وجدانك شيوخٍ بعز ومهابه


لاتبدي الدمعه ولا تشكي البين
واللي يبا يرحل تحرى أيابه


وكنه يقول إن رحت واحنا بعيدين
والله لأهل دموع مثل السحابه


ياكيف وطيوفك لنا دايم تبين
في كل دربٍ معك باسـل مشابه


وذكراك حتى مع جموع المصلين
وذكراك مع زاد الحبيب وشرابه

والعطر والسبحه معا مصحف الدين
اللي تحفظنيه قبل الكتابه


ذكرى تهز قلوب منهم قويين
ياكيف طفل الخامسه واعذابه


خـلاص ياباسـل غدا القلب نصفين
فكيت بابٍ ماحسبنا حسابه

استودعك ربي وربي لك يعين
وياالله مودعكيه مما نهابه

واليا بقينا فوق هـ الارض حيين
برجع لك ولصحابنا والقرابه

وسلامتكم

اخوكم/ وصل الله عيضه العقيلي