شفني

ليلي عتب ....... ولا أنت ليلك ما يفيق
غافي هدب ........ وأنا يناديني طريق

وشفني إذا تقدر تشوف
جيتك رغم كل الظروف

وما حال حول من العمر
ألا وأنا أشد الرحال
لرضاك يغريني السفر
كنك تناديني تعال

وشفني إذا تقدر تشوف
جيتك رغم كل الظروف

وكنت أحسبك قدام أجي ناسي
وأثرك معي وتحس بإحساسي

هذا أنت هذي عينك ....... يوم اللقاء توّاقه
هذا أنت هذي يدينك ...... لمصافحي مشتاقه

وهذا أنا خذني على صدرك
وأسرق من شفاهي كلامي
في ليلتك لو باح لي ثغرك
تثمل بقايا جرحي الدامي

وبالله لا تعتب على صوتي
مبحوح من كثر الحنين
بالله لا تعتب على عيني
جفت مدامعها من سنين

خذني ودفيني غلا
الشوق بارد ما يحن
أنا خفوقي ما سلا
يسأل عليك وما سكن

وشفني إذا تقدر تشوف
جيتك رغم كل الظروف

وهذي صباح الخير شايفها معك
خذني من أولها أنا أحب أسمعك
وأنثرني بكفوفك على شاطي غلاك
و لا عاد تجمعني أنا اللي بجمعك

أنا يكفيني من الصحراء نفلك
اللي شذاها عانق إحساسي
وأموت وأحيى كل ما بيّن عسلك
بعد السهر على طرف كاسي

وإن كان يرضيك الكلام
اللي بقوله ....... لا تنام

خليك صاحي وأنتظر
لا حال حول من العمر

أنا رغم كل الظروف
بجيك وبعينك تشوف