للي عنـــده وقت ..,,

[align=center]السلام عليكم ورحمة الله وبركاته ..

قد لايكون عند الكثيرين الوقت الكافي لقراءة المشاركات الطويله نوعً ما . ولكن احببت ان اطلعكم على هذه المشاركه المتواضعه والتي كنت قد القيتها في احتفالات العيد هذه السنه ,(احتفالات اهالي منطقة دفاق من قبائل القُرح و آل محمود و الكدوه ) لأول مره وقد طلب مني اعداد مشاركه تشمل عدة مواضيع ولذلك ادركت طول المشاركه ولتجنب الملل لدى المستمع صغت القصيده بأسلوب جديد بحيث اكتب عدة قصائد و اربطها بطريقه و القيها على انها قصيده واحده و انتقل من موضوع لموضوع بشكل مشوق وكانت الحصيله ثلاث قصائد في قصيده ورغم خصوصيتها من حيث المسميات إلا ان هناك امور مشتركه وخاصه لدى الباديه .. اترككم مع المشاركه على امل انا تنال بعض استحسانكم والعذر على الإطاله .., :)
"[/align]
"
[poem=font="Traditional Arabic,6,darkblue,bold,italic" bkcolor="transparent" bkimage="backgrounds/24.gif" border="double,4,gray" type=1 line=0 align=center use=ex num="0,black"]
يا عيد يا اللي فيك فرحه وتخفيف=للنفس من هم الحياه وغثاها
فكرت أرحب قلت لا أعفا ولا عيف=الأرض جاها خيرها من سماها
اشلون أرحب و المعزب مع الضيف =هذاه مفرشها وهذا وفاها
في ليلةٍ فيها تطيب المحاريف=والتهنئه لملوكها و أومراها
حكامنا ون لجلجت بالغطاريف =أهل البيوت اللي يذرّي ذراها
ولاة الأمر اللي لهم كل تصريف=تتبع لهم كل المدن مع قراها
و اللي ممثلها بتكليف تشريف=رجله في واجب مهنته ما ثناها
همزة وصل مسئول راعي معاريف =يتعب لنا بالحاجه اللي نباها
مأمون مستأمن , وظيفه وتوظيف=هاذيك يدعمها وهذي رعاها
راعي وفا معروف من دون تعريف=و أهل الوفا ربي يسدد خطاها
يا الله يا منشي المزون المراديف=اتعز دولتنا وتقهر عداها
دوله لها من منكف الما مناكيف=حد البحور اللي تزايد بماها
ون جات رحله للشتا جات للصيف=نعرف حدود المملكه من حصاها
و المملكه من دونها شذرة السيف=عهداً علينا ما يُدنس ثراها
ناقف لها وقفة رجال المواقيف=اللي مواقفها تبيض لحاها
هذي لنا و أم السفافه على السِيف=أدنا ما حركها وترجع وراها
ما همنا قوم العقول المناصيف=يا اهل النظر قطع الدلي من عراها
ما للعصابه غير روس المخاطيف =ومحاصرتها لين نلعن ثواها
الزمره اللي كل واحد بتوصيف=قليل طيبها كثيراً رداها
استهدفوا لأهدافهم كل ما شيف=حتى المسالم ما سلم من اذاها
و استخدموا لأغراضهم كل تحريف =حتى انكشف ملعوبها و اعملاها
و بعد انكشف من حولها كل تزييف=أظن ما يلحق عشاها غداها

" " " " " " " " = " " " " " " " "

و العيد فرحه و أكثر الرمي تهديف=و اهدافنا فوق الرجوم الطوالي

" " " " " " " " = " " " " " " " "

يا عيد ليلك خير و أيامك افراح=و الله يديم ايامنا و الليالي
قبلك شهر جا فيه تقسيم الأرباح=أحداً ربح و أحداً من الربح خالي
و اللي توفق فيه من همه ارتاح=و اللي مقصر فيه يا هم لالي
و بعدك صيام الست تكفير ما راح =تعدل صيام الدهر في أول وتالي
هذي مواسم و العباده للأرواح=زاد القلوب من الدنس والخمالي
و الوقت يا الأجواد سارق ومزاح=يا كم فقدنا فيه من كل غالي
و الآدمي مخلوق في الأرض سواح=ولابد ما يسأل على كل حالي
و العيد فرصه للتسامح و الإصلاح=إصلاح ذات البين قبل ألسؤالي
تسامحك ما هو بضعفه , و الإصفاح=أخير من سلم الذهب و الريالي
ابدأ نفسك , و ابن عمك ليا طاح=تحمله لن كان فيك احتمالي
إن كان زله خل خاطرك دماح=و إن كان شرهه قول يا كم غدا لي
و إن كان ماليه غدت عند مطواح=اخذ العوض من رب ذيك الجبالي
و الستر نعمه و أكثر الناس لحاح=هذا ذبح نفسه وهذا اتكالي
و الخزنه اللي ما لها غير مفتاح=طشيتها لو انها من حلالي
عندي كثير المال لا جا ولا راح=أهم حاجه غترتي و العقالي
يا عيد ليلك خير و ايامك أفراح=و الله يديم افراحنا و الليالي
بوجودكم يا ربعنا قوم الأمداح=على مقابلكم تُشد الرحالي
و الحمد لـ, الله ما بقي هم ما انزاح=ما عاد للأعذار يبقى مجالي
الخط نُفذ والعواميد طياح=و البيت مبني و المفارش زوالي
و الخير مقبل و المطر بارقه لاح=تحيا المناطق من حياة الرجالي
و انتم حياة الدار مضوا ومسراح=و القوم محيين الديار الخوالي
" ديارنا صارت مفالي " لقياح "=من قلة السكان صارت مفالي"
أما نعمرها على صح و اصحاح=و إلا نسلمها عيال الحلالي
من لا تعاون مع بعيدين الأشباح=ما أظن يعرف ميلها والعدالي

" " " " " " " " = " " " " " " " "
و العيد فيه اشواق والشوق فضاح=ما تجهله قوم القلوب الرقيقه

" " " " " " " " = " " " " " " " "
يا عيد يا اللي فيك تجديد الاشواق=شوقتني لن كان تبغا الحقيقه
شوقتني و انا صوابي بالأعماق=من بعد فرقا السامي اللي نويقه
مير العوض في لزة البير و أ "دفاق "=و احليل و اجبال الوكف و الحريقه
و السنح و البكره وسكنه ولو ضاق=وادي طُريّف من يوسع مضيقه
يا عيد يا اللي فيك تجديد الأشواق=ذكرتني لن كان تبغا الحقيقه
ذكرتني بأشعاب ينشط لها الساق=لن عودت فزعة رفيق إلـ , رفيقه
داراً حموها اجدادنا قبل الأوراق=من قبل صك المحكمه و الوثيقه
من حدها البيّن ليا روس الأشفاق=ما طبها الطماع حره طليقه
و اليوم نسكنها على عز و وفاق=و الخير من بابه عرفنا طريقه
بدايته يوم انفتح باب الأرزاق=بقدوم من جعل الولي ما يعيقه
" سعد " ولا مثله على الخير سباق=قد الأمانه و العهود الوثيقه
قبله كثير من الشجر حت الوراق=و اللي ضمي من دهر ما بل ريقه
و البدو لا منه شعا كل براق=قالت كريم ورحمة الله حقيقه
يا عيد يا اللي فيك تجديد الأشواق= شوقتني لن كان تبغا الحقيقه
شوقتني و انا من العام مشتاق =للديره اللي فراقها ما نطيقه
ديرة هل النخوه عريقين الأعراق=سموا علا قوم السيوف الرهيقه
و أهل الحميه كان يبسن الأرياق=أربع قبائل و الشقيق الـ, شقيقه
الجد و احد و ان حصل لم و افراق=تعمر وتبني والمباني وثيقه
و انا اشهد ان الناس في خلقها اذواق =شيً يطاق وشي لا ما نطيقه
يقطعك يا عرق ألشري لا بقي ساق=ويسقيك يا راس العيا بالدقيقه
و الشعر فن وموهبه جُل و أدقاق=مثل الحياكه بالخيوط الدقيقه
و الشعر يا اهل المعرفه سوق الأسواق=لمدورين الذاهبه و اللصيقه
و الشعر معنى و أجمل الشعر ما لاق=مثل الورود اللي بوسط الحديقه
تمت وصلى الله على نور الأفاق=مُبلغ الإسلام مُعتق رقيقه


** عطا الله القارحي **[/poem]

ون جات رحله للشتا جات للصيف
نعرف حدود المملكه مـن حصاهـا
و المملكه من دونها شذرة السيـف
عهـداً علينـا مـا يُدنـس ثراهـا
















































الله يعطيك العافيه
وصح لسانك
مشكووووووووورررررررررررر

[align=center]صح لسانك اخوي عطا الله[/align]

ما شاء الله تبارك الله...


صح لسانك يا عطا الله..

قلت فأجدت ...


وهنيئا للهذلان بشاعر مثلك ...

يا سلام سا سلام

صح لسانك والله وهذي حبة على الخشم

تصريف وتنويع وقافية روعه

ومعاني جزله وبيض الله وجهك

وزدنا منها

تم حفظ نسخة منها

صح لسان الشاعر الكبير عطا الله القارحي

تــــــــــــسلم

على هذا الإبداع وعلى هذا الحضور القوي

الله لا يحرمنا من إبداعك

أخووووك

ماجد المسعودي