صلاة الفجر

[سيف الهذلي]

يوم الحذيفي يرتل في صلاة الفجر = ايات من سورة التوبة ويبكي بها

صوته يزلزلك لو قلبك حديد وصخر = وتحس روحك دفا الايمان يجري بها

في لحظة ٍ تعتبر فيصل ولحظة طهر = فيها الحقيقة تبين وينجلي غيبها

اسجد لربك ولامنه هروب ومفر = مافيه نملة تدب الا ويدري بها

ترى نهايتك خام أبيض وموت وقبر = ماينفعك بهرج الدنيا وأصاحيبها

مقرك الاخرة دنياك ماهي مقر = النفس ماتدري ف بكرة وش يصيبها

سجدت سجدة وكن الأرض ريحة زهر = الله يا ما أحقر الدنيا وأساليبها

فيها تذكرت موقفنا بيوم الحشر = نارا ً تلظى وتخطفنا كلاليبها

في وقتها بس حسيت بدموع القهر = ياطيبها ساعة الرحمن ياطيبها

قمت أتراجف وكن الدمع مثل الدرر =والقشعريرةغشت جسمي مخاليبها

حسيت ثقل الذنوب اللي تقص الظهر = كيف اجرفتني ورا الدنيا وألاعيبها

كيف اخدعتني ونستني طريق السفر = ضاعت سنيني هدر من غير لا أدري بها

مرت سنيني وعدتني بلمحة بصر =مابين زخرف حياة وبين أكاذيبها

كنت أحسب اني ذكي وان الليالي قمر = واني وأنا مغمض عيوني ابسري بها

اثر الأماني سراب ومن حسبها مطر = بيموت عطشان في رجوى مشاريبها

خلك مع أهل الفلاح أهل الدروب الخضر = وابعد عن اللي نواياهم عوى ذيبها

سفينة الدين ما تغرق وباقي شبر = معمور بالذكر والشبان من ... شيبها

الشاعر منصور الحربي.

 

[مشارك جديد]

جزيت خيرا ,وصح لسانك ولسان شاعرها

 

[فـتى هذيل]

بيض الله وجهك ياسيف ...........وصح لسان قايلها

فيها تذكرت موقفنا بيوم الحشر = نارا ً تلظى وتخطفنا كلاليبها

نعوذ بالله منها

 

[ماجد]

الله يجزاك بخير ويجعلها في موازين حسناتك

وتقبل مروري

 

[سيف الهذلي]

مشارك جديد وفتى هذيل وماجد اشكركم على المرور والله يبارك فيكم .

 

[سلطان السويهري]

نصيحة من شاعر

 

[عيسى السويهري]

صح اللسانك واللسان الشاعر

جزاك الله خير على هذه القصيدة الرائعة

 

[سيف الهذلي]

ابو رواد بارك الله فيك .

دائما مرورك يتأخر كثير هذا اذا جيت. أثابك الله بنيتك ولن يخلق معنى لم أقصده .


أرجو لك المزيد والمزيد من التوفيق .

 

[سيف الهذلي]

عيسى السويهري بيض الله وجهك وبالتوفيق .