فواز
سلام ردية لها في خاطري غاية وشان===مثل الشهد في طعمها مثل القمر في نورها
يالله طلبتك ياعظيم الشان من قلب ولسان===حرر فلسطين الحبيبة من يهود تزورها ا
بو بسام
يا مرحبا من هاجس نوره على الظلما يبان 000 مثل الورود اللي على العالم تفوح زهورها
لا بد ما ياتي نهار وندحر النذل الجبــــــان 000 حتى يخاوي شلة الفيران جوف جحورهــا
فواز
تبقا ويبقون الرجال اللي على قدر ومكان=== مايختلف سلم العرب مايختلف دستورها
متى متى قلي متى نزرع ثمار الضيمران=== ونسوق شلتها بعد ماينكسر خنفورها
أبو بسام
خلك على هونك ترى ما للسنان الا السنان 000 وابشر لاحطه في جباه اهل الردا ونحورهــــــــــا
ان قاله غير نزرع خوخ جنب البرتكــــان 000 واقلع شجرة (ن) حطها راس الكفر بجذورها
فواز
ياعود ياللي منشقر ماتنجبر طول الزمان===ذيك الخلية في زمان الياس كيف تشورها
والفارس اللي نحسب انه ممتطي هاك الحصان===له نية(ن) سودا يبا يبني وراها صورها
أبو بسام
يا وجد روحي يالرجال اللي لها رفعه وشان 000 واليوم يا فواز اكلها الدود جوف قبورهــــــــــا
ما باقي الا اهل المصالح من مكان اليا مكان 000 والخوف يالصاحب خصومك يدهنون سيورها
فواز
انشهد انك قلتها مافيه للدنيا ضمان===واليوم صرنا بين عمي الملحدين وعورها
من بعد ماراحو هل الماقف يادوب اللعب زان===المملكة جاي(ن)سراها ينتظرها دورها
أبو بسام
ما بط كبدي غير من عشره يرجعها ثمان 000 اليا احتمت نيرانها والشب تحت قدورهــــا
يا قصر يده فالملاقى واللسان اطول لسان 000 ياليت منهم في حلاه تخش جوف قصورها
فواز
مابط كبدي غير مشيه بين ذربين اليمان===مايدري انه لحتمت بموخرة طابورها
اللي سواته ماحد(ن)يستامنه في رعي ضان===لكن وين اللي لها حكمة وتحكم شورها
أبو بسام
طيب وش الدبره بعد ما حل وقت الامتحان 000 بكره ترى الارزاق تصبح في يدين طيورها
اما عقدنا شارنا والا تركناها تهــــــــــــان 000 وامرح وانا ابا امرح وخل الناقه لباكورهــا
فواز
الدبرة انا نجتمع مانقبل الواد الطمان===حتى ندق الحية ام جنيب في حنجورها
وبك انت خابر يا رحيمي يوم ذكينا السمان؟؟===نهار قفت شلة الملعون مع خابورها
أبو بسام
اجل توكلنا على الله واحتزم بالجبخان 000 وابشر بميقاف السباع الشهب جنب صقورها
ونخلي القدس الحبيبه يارحيمي دار امان 000 ونشيل راس الكفر منها ثم نهدم سورها
الله يذكرك بالخير ياأبو غيث ....قدس العرب ماتاصلونه ....من دونه الثعبان الأقرع
الليل سرى يالرياجيل ......وبكره ورانا دوام ...نبنتشرف برؤية م.غ .مثلث
تصبحون على خير
