جبت لكم سالفه عن ثلاث اخوان من قبيلة الظفير ، واحد اسمه سالم والثاني غصين وكان اصغرهم بالعمر
وغصين دايما يسبب لهم بعض المشاكل مع جماعتهم ، والمقرود كل ما صارت مشكله طلع اسمه فيها
وحصل مره انه ... زعل عليه اخوه الكبير وضربه وطرده من البيت .... وزعل غصين وتضايق من اسلوب
اخوه اللي ما توقعه ، قال: لك اللي تبي انا طالع مو من البيت بس .... انا طالع من حياتكم كلها
رد عليه سالم بحالة غضب: روحه بلا رجعه .... جعلك ما تعود
وبعد رحيل غصين انشد هالابيات:
عزى لكم لا غبت ولا جيت
ــــــــــــــــــــ من عقب جمعاكم غديتوا شتاتي
اضرب لكم بالسيف لا مني ادليت
ــــــــــــــــــــــ ما يــدب العيال ضــرب القنـاتي
واسرح لكم بالذود لا مني ألفيت
ـــــــــــــــــــــــ واثني لا من هجن بكم مقفياتي
وبعد مدة من غيبته أخذ له دم ذبيحه ورش فيها ذلوله وشداده وعطاها لواحد وقاله وصلها لاخواني
واذا سألوك قولهم انذبح اخوكم وهذا دمه علشان يصدقون، وبعد ما وصل الذلول لاخوانه بهالحاله
وسماعهم بذبحته بكوا وتكدروا وأنبهم ضميرهم باللي سووه بأخوهم وبالذات سالم
وصل خبر وفاته لبعض جماعتهم اللي بينهم وبين أهله مشاكل ومنافسه على مارد الماء
وعلى منزل البيوت وكان غصين بالنسبه لهم مصدر قلق وازعاج، وصاروا يضايقونهم ويبعدون ابلهم عن الماء .....
اما غصين اشتاق لشوفة اخوانه وحالهم من بعده ... رجع لهم من غير ما يدري احد عنه وصار
على مقربه من جماعته وشاف اللي يعانون منها اخوانه من بعده ، وبعد ما حل الظلام قبل لا يدخل البيت
سمع سالم اخوه ينشد بالربابه:
البارحه بالليل ما نامت العين
ـــــــــــــــــــــــــــــــــ والدمع من جفني تزايد ذريفه
قلبي تدالن كثير الشواطين
ــــــــــــــــــــــــــــــــــ كبر الهضـاب العاليات المنيفه
حملت همن لي مع القاط قاطين
ــــــــــــــــــــــــــــــــــ والبال مني غير الــوقت كيفه
الذود عندي له عن الماء اظماوين
ــــــــــــــــــــــــــــــــــــ يحن من فــرقــا دلالــه وريفه
شرهه تحن وتزعج الصوت لغصين
ـــــــــــــــــــــــــــــــــــ وتجاوبه بالصوت بنت الرهيفه
واخوي لا جتنا من الربع الادنين
ــــــــــــــــــــــــــــــــــــــ ارجح يعدي منكبه كل عيــفه
ولا ليا قالوا لى الغزو ملفين
ــــــــــــــــــــــــــــــــــــ فزيت فزت عاشق شاف اليــفه
وبعدها دخل عليه اخوه وقال : ابشر بالفرج يا خــوي
تحياتي للجميع
