النفـس خزنـة ملـك.. والحـزن قاطـع طريـق
والجرح؟ .. يوجـر عليـه المسلـم اليـا أحزنـه
وأنا مـن العـام .. وآنـا أشعـر بيبسـان ريـق
يفـرج سجينـي مــع عيـنـي وأرد أسجـنـه
مـن بيـن طيّـات صـدرٍ شـل مـالا يطـيـق
لا جـاع حزنـه؟ .. تعشّـا جـروحـه المزمـنـه
مجسّـم أنسـان مـن داخـل رمـادة حـريـق
وقـودهـا المغـريـات .. ونفـسـي المؤمـنـه
أحيانـاُ.. أبكي مـن الخشـيـة لحـد الشهيـق
وأحيانـاُ أقـبـل عـلـى الآذان .. ولا أذّنــه
مـا عاد.. أنـا.. أيّـاي.. يا اللـه لاتخلّي عويـق
عاقت بـه عـيـون روس مدلبـحـه .. وألسـنـه
كتل هـوامـش بشريّـه .. تـنـام وتفـيـق
رديـان وحتّـى الـردى .. بالضبـط .. ماتتقـنـه
لكـن علـى كل حـال .. الطلـق يبقـى طلـيق
لـو عاينتـه العـيـون .. وضـدّتـه الأزمـنــه
عـذر السنافـي معـه والعـذر حبـلـه وثـيـق
لـو حـس رعبوبـتـه .. والاّ جـفـا موطـنـه
رعبوبتـي ,,, يـا وجودي يـا غـلاك العتـيـق
عنـه مكـانٍ لقيـتـك فـيـه عـامـا .. عـنـه
يـوم الشجر صاير ..لوجهـك مشجّـع فريـق
مـن ويـن مـا أفتـرّ.. تتغيّـر معـه الأمكـنـه
للحـين باقـي بدربـه من رحيقـك رحيـق
وللحيـن أيتمتـم حكينا الـعـذب .. ويدنـدنـه
يوم أنّي أشّـر علـى صدري وعينك تويـق
وآقـول أنتـي هنـا .. وأتقولـي .. أنتـا هـنـه
الهاء .. فآخـر كلماتـك بـصوتٍ رقيـق
تشطـب علـى برمجـة سمعـي .. وتستوطـنـه
منتي بشر جعل مـن جابك .. ضحيّة زريـق
شارعـك يحسبـ لـك بالأمـتـار .. يا مفتـنـه
اليا أنتصفتيه؟ يضيـق .. وكل مالـه يضيق
كنّك ..كوكاييـن .. وأرصفتـه خشـم .. مدمنـه
رعبوبتي؟ .. ماخبرت أنّـه تحـرّك طويـق
شاعـرك مجـنـون خلـقـه والشـعـر جنّـنـه
قولي لهـم ينتـهـون ولا يطـول الزعيق
الميـسـرة ميـسـره .. والميمـنـة ميـمـنـه
وقولي لهـم للعراقة .. راس صبيٍ عـريـق
يـا كم سـرٍ يعـرفـه .. بــس ما يعلـنـه
نواخذ البحـر .. ولا أرسـي ..بجال المضيق
والشي بالـشـي؟ .. لا عيـبـه ولا أستحسـنـه
الاّ الرفيق اللّـي يستـغل طيـب الرفـيـق
هـذي اللّـي ما هيب مقبـولـه ولا .. ممكـنـه
يا صاحبي؟ كان لك مـال الشقيـق ال شقيق
والحيـن جـمّـع بقايـا ما مـضـى وأدفـنـه
ويا قلبي اللّي وساويسـك تنـجّـي غـريـق
الله لا يـصـغـر أبلـيـسـك .. ولا يلعـنـه
ما هو فخر في سنه .. تعرف لك مية صديـق
الفخـر ؟ تتعـرّف بصـديـق .. لمـية سـنـه
