مايباه و ما يريده علـى خشمـي هـذاه

[كاسب الطيب]

الحبيب اللي نكبني وانا استذنبـت فيـه
ماربحنا واسـال الله لـي ولـه النجـاه
طاح في حبي وانا طحت كلي في يديـه
المطيح اللـي يشـاف و يشّـد الانتبـاه
فيه زين استغفر الله منه واتـوب اليـه
يفقد العاقل صوابـه ويخلـف مستـواه
اشهد انه كامل اوصاف ولا لـه شبيـه
مار عاقبنـي بظنّـه و سوّابـي سـواه
يحسبني عنه لا ابطيت مالي نفس اجيـه
مادرى اني لاجل عينه عكسـت الاتجـاه
يحتريني فوق رجـم المحبّـه واحتريـه
اسبقه في امرار و امرار يسبقني عـلاه
لين وكّد حبّه اللي مثل صـرف الجنيـه
وقام يزعل ويتغلـى عليّـه مـن غـلاه
الغلا خـلاه يفعـل معـي مـا يشتهيـه
يفتح الموضوع و يسكّـره علـى هـواه
ازعله وارضيه وازعل منه وارضى عليه
وفي دقيقه قبل يطلب رضاي اطلب رضاه
ليه اكابر معه وانا اعرف انه حق ليـه؟
مايباه و ما يريده علـى خشمـي هـذاه
يعرف اني مقدر اجفاه ورضـاه اشتريـه
واعرف انه من وجودي معه ماله غنـاه
مستعد ارضيه و اعطيه كل اللـي يبيـه
بس ما يزعل عليّ و يجيـب اللـي وراه
المحبه نار مـن طـاح فيهـا تشتويـه
ولو زلقت وطحت في النار ماشفت الحياه