بعد السلام عليكم وكيف الحال وفي غيابنا ويش سويتم مدري على العهد والميتاق ولا بمواضيع رزق الله تسليتو
اليوم بدي اقدملكم حلوى مكاوية دايمنها تتقدم أيام العيد لا تستعجلون
وتقولون السوقدانه لا لا لا > سواقدان بالسوقدان
ذكرتموني بكرتون أومادااان بالأومادااان ههههههههه
ولا تقولولي الألماسية لا لا لا
ولا رز بلبن لا لا لا
ولا خُشاف لا لا لا
ولا طبطاب الجنه لا لا لا
هااادي الاكله هي الدبيازة هيا كلنا نصفق للاكله اللزيزة دي
صفقا جماعيه ياهوووو ***
صفقة جماعيه يا هووووو
وهااادي الاكله مطلوبه من سيدي وتاج راسي ابو مغبش وبالهناء والعافيه لكل اعضاء الموقع وبدي احطلكم سلطانية دبيازه بعد
ما ازبطها في مجلس الطبخ عشااان تدوقو وتدعوللي وتسيبووكم من الشعيريه بالسكر يا بدوووو ههههههههههههههههههه
شكلي طولتها وهي قصيره وابهاتنا قالو حكايه المقص كلمتين وبس هههههههههههههه
طيب ايش رايكم في الموضوع القادم نكمل الطبخه هههههههههههه
عشان آخذ العضو المميز والموضوع المميز ههههههههههه
واتمنى ايضا لقب الشاعر المميز اللي محتكره اخويه رزق الله لكن شكله حاشوفلي صرفه مع الشعر واصير شاعر ولا جسيس هههههه
طيب أكيد طفشتكم عشان كدا نرجع لموضوعنا
الدبيازة :
تروحلك للنوري ولا المستهلك وتقله يسلم عليك نمط رهيب وتديله ورقة مقاضي الدبيازه :
تمر أبو قلاده وقلادة واحده فيها البركة وسموه يا حبايبي ابو قلاده لانه حبات التمر منظومه في خيط > وهاادا ما تحصلوه في الحلقه يا اخوان تكفون هههههههههه
ولوز بجلي وعشرين حبة هيل وعشرين حبه فستق وعشرين حبة بندق > مو بندقيه وتجيبولي الهورنيت حقت سلطان ههههههه
ولا تنسووون معاااكم الزبيب الرازقي عشرين حبه والقعقع وشكلكم ما تعرفوه اللي هو الجوز
وعشرين حبه سن العجوز > بس ما تروحلك تخلعلي سن بالزراديه لا ياخويه الله يخليك هااادي من حوايج الدبيازه وانا ماني مسئول عن اية عجوز يتخلع لها سن من سنونها بالزراديه ولا بالكلبتين أنا مالي شغل ولا اقولكم لا تسموها سن عجوز سموها باسمها التاني سموها الكاجو هههههههههه
وعشرين حبة صنوبر واللي يوفر مصاريف يقلل من الصنوبر لانه سعر الصنوبر نار يا حبيبي نار ههههههه
وبقي اهم شي للخلطه وهو قمر الدين والمشمش المجفف والتين المجفف ومدري تحصلو شي جديد منها مع المشاكل حقت فشار الضبعه قصدي بشار الاسد هههههههه
دحين تنقعوا قمر الدين كم ساعه في مويه حاره لمن يلين ونحط المكسرات اول في القدر وتتحمس بالسمن البري وشويا زبده لمن تحمر وتتقمر مزبوووط وتاخذ اللون الدهبي بعدينه نحط قمر الدين والمويه اللي معاه في القدر مع بقيه الحوايج وعلى نار هاديه مروووقه بالمرة تتطبخ طبعا راقبو التقل حقها تبغوها تقيله لا تكتروا المويه تبغوها خفيفه قللو المويه والتقاله صنعه ههههههه بس في آوادم تفضلها خفيفه عشان تشربها زي العصير وناس تتقلها عشان تاكلها زي النواشف والنفس وما تريد
السكر يا اخوان نحطه في الاخير مررره وانا دايمني اقسم الدبيازه في قدرين ادا استوت قدر اخلطها بالسكر وقدر لا آ لانه في ناس معاها سكر ومش ناقصة سكر لانه حلاهم زايد ههههههه ونمط رهيب يبغى سكركم مزبوووط يا سكر انتم هههههههههههه
وهاادي الطبخه ابشركم انها تجلس معااااكم في التلاجه لمن تطفشو منها وما يتغير طعمها وما تخرب قوااامن يعني حقت عشرين يوم بالقليله وبالعافيه عليكم مطرح ما يسري يمري
والموضوع حصري لحد ياخذه الا كامل لا يزيد ولا ينقص ويحوس الحسبه ومن حقي عليكم انكم تكتبوا اسمي وحصري لموقع هذيل ولا بعدبن اشتكيه وواديه في سين وجيم ههههههههههه
يا اخوان لا تنسو تقييم الموضوع تروني تعبت عشان اطبخلكم اليوم حر وروح الدكان وخش المطبخ والمكيف خربااان والتقييم ببلاش زيه زي كلمة شكرا يانمط رهيب ماعليها جمرك هههههههههههه.
التعديل الأخير:
