جولة الرياض (شاعر المليون3 )

جولة الرياض (الحلقة الاولى )


ضيدان المريخي



هي حضرة الشعر بأول غيبة الملهمة
أو إنها شرهة الشاعر على مايصير

ماأدري ولكن هجوس الليلة المظلمة
على رجا شمس مابين الضحى والعصير

إن ضاق صدر الكلام وملت الترجمة
مال السؤال الكبير إلا الجواب الكبير

وين أنت يافكري اللي مايطير سهمه
إلا على صيدة ماحط فيها خشير

حرفك بصدري من البارح وله همهمه
(تسـ)ـنه على جية الهاجس برجوى بشير

تغن دام المشاعر بالغنى مفعمة
وأعرف ترا مايلج السمع غير الصفير

وإن شفت دون المدى دبك يثير كتمه
ميعادك الغيمة اللي تاليتها غدير

*********************

عبدالله الظفيري



اللي بقى لي مع الأيام .. وفّيته
والضيق لو ينهمر تشربْه ودياني

ماهي كبيره علي والحزن غنيته
وْلاهي غريبه إذا وقتي تحداني

الخوف -واللي تطوف الخلق في بيته
لاعشت زهرة شبابك وانت وحداني!!

كم جرح خذْته من الأحباب.. ضمّيته
وجروح قلبي زكاة لْحُـبّّ خِلاّني

مطعون؟ عاااادي ،، جفا الأقراب؟ داويته
تعبان؟ مبطي ،، ردى هالحظ؟ خاواني

صدمه؟ بسيطه ،، هَوان الحال؟ مرّيته
مقرود؟ خِلقه ،، وإذا حرمان؟ عدّاني

*********************

فيصل بن طواله



التناكر بين (( خلق الله )) بدى
صار هذا تقل مايعرف هذاك..!

(( الفتن )) خلت رفاقتنا \ عِدى
(( والوجيه البيض )) تطعن في قفاك..!!

إستمع صوتي \ ولاآبيلك صدى
ذاخرٍ (( ياذيب للمرقب )) اعواك..!

بح (( صوت العقل )) من طول الندى
إلمس المحسوس \ وإستخدم ذكاك..!!

(( فرصة التغيير )) لاتذهب سُدى
قبل تبدى .. خطوتين \ إرجع وراك..

طيبتك مع (( بعض خلق الله )) ردى
لاتواضع (( وأسفل العالم )) رقاك..!!


************************

سلطان عبدالله الشمري



تولم يازبون الطايلة نبي نقمع الداكوك
نبي نرقى لقمتنا وقبتنا أبدفنها

وإذا ودك أعلمك الفخر إذا هم نسوك
من عيوني وأنا القمة لجل عينك أعاينها

أنا عبده ، أنا الأسلم ، أنا سنجاره وياخوك
الدولة ترا تفخر إليا قالوا مواطنها

تنزه يا عشير الطايلة عن عاشقين الروك (Rock)
وعارضتك الأصيلة والتليدة دوم لحنها

وإذا غثك خبل قدموا ضيفه يوم جاه الكوك (Coke)
أبي بسفهتك مطحانه هروج الخبل تطحنها

ولا تستغرب دام صوير يفتخر باللوك (Look )
عوير لا طلبك أغنية لهيفاء معه غنها

وذا الخايب رفع خشمه ،خشم جده قبل مفروك
ولا تحزن لأن نيتك صفة كنايس مع مآذنها

*******************

محسن خاشم الروقي



سلام يالجنة المليون
تكفون تكفون جيزوني

ولبوظبي كان بتروحون
معكم على الباص شيلوني .. ( لو مع ورقكم على الطبلون )

لمحمد الخير ودوني
أبغى محمد ولا تهونون .. ولا وصلتوه وطوني

( ملاحظة : تم إجازة هذه القصيدة !!! )

********************

سعود الحافي العتيبي



وأنا وأنا ماني ناظم وقصاد
شاعر ولي تمحيص الأبيات عادة

أنحت صخر وأشحذ همم وأقدح زناد
وأحرق جمل وأدفن بقايا الرمادة

حق النحاس النار والجمر وقاد
والجوهرة للفلترة والاعادة

أخاف من شرهة عوارف ونقاد
لا جت بصيغة عقد وإلا قلادة

هذي ثلاث سنين سرداد مرداد
ومركز حياتي ماعطاني شهادة


**********************

محمد عمر الشهري



فمان الجرح لا والله فمان أحزاني الكبرى
فمان أغلى ثلاث سنين مت إبها عشان أعيش

فمان الحب وأحلام القلوب البيض والخضراء
فمان الآه من كثر الزعل والشوق والتطنيش

فمان عيونك اللي مالها بين العيون أخرى
فمان غروري اللي علم الطاؤوس نفش الريش

فمان عطورك اللي تسكن أنفاسي وبالأحرى
فمان أنفاسك اللي تسكن عطوري وماأدري ليش

فمان الليل وأحضان الدفى ومصافح القمراء
فمان الباب والشباب يوم أواعدك ونطيش

*********************

سلطان حسين الدوسري



مابين تطبيق السلام وبين تحديد المصير
نشعب ركايبنا و ونحداها على رد البرى

يسوقها ضرب العصا ويهجها حص الصفير
وتدبك بنا واللي على الركب يهرول مادرى

تمشي بنا والقيض يشويها مع طول المسير
وتبرك بنا في وسط سوق بين بيع ومشترى

وإليا إلتفتنا للجمل حن ورغا بعد الهدير
وحتى الصميل اللي على جنت المطيات انفرى

وحنا نحسب إنا بلغنا القصد والخير الوفير
ماندري إن الوقت وقفنا على باب الزرى

صحيح نملك مال بس احساسنا حس الفقير
واللي يواسينا صلاح الدين لا منه طرى

وصلاح مات وجاتنا الدنيا عبوس قمطرير
وحد(ن) رقد منا و الآخر مات ماذاق الكرى

نبغى الحضارة لين مركزنا طلع بعد الأخير
ولا عاد به غيره سواة اللي على الذلة ضرى

وإن كاننا مليار مسلم ما بنا صحوة ضمير
بـ أكتب نهاية أمة تعيش تحت الثرى

*********************

محمد الهجره



البارحة في الحلم قابلت زيدون
زيدون ماغيره طلع في منامي

مدير مسرح شاعر الحلم مليون
اللي على المسرح يجيب الاسامي

اللي إليا أقبل تشخص لشوفه عيون
وفي إيديه ظرف شد كل الأنامي

يا مفسرين الحلم لي وش تقولون
تفسيركم نور يزيح الظلامي

وفي العلم يازيدون وأكون ممنون
وصل لأبو خالد محمد سلامي

**********************

خالد عطيه العنزي



يامستوى علم عزيز كان تحت المستوى
بإن الرسول (صلى الله عليه وسلم) أمسى ثلاث أيام وبطنه خاوية

وياحامل أعلام الجنود اللي يرتبهم لواء
لا تعامل أحلام الجنود بعينك المتماويه

أبسألك يوم السيوف بـ بدر حفارة ثوى
أبسألك يا صاحي وش كان فعل معاوية

فلو أولي الضعف استحالوا أن يصبحوا أولي قوى
ما كانت بيوت الشعر من شعرها متقاوية

النفس نفس النفس ولكن فرقها بـ المحتوى
ياليت نفسي نفس مانفسي تمنى حاوية

************************

ماجد العتيبي




الهم نار ماعطت للفرح دور
وأكبر ضررها فـ أوسط الصدر ويسار

كانت ولا باقي لها أية حضور
اليوم في صدري من أحداث الأقدار

كن الضلوع أغصان وهمومي طيور
ولا من هنا اللي ملله وقته وطار

ودام الزمن ماهو معي وافي شبور
ابستميت وكن ماصاير(ن) صار

مانيب من يشكي لناصر ومنصور
باعيش وآمالي بمعبودي كبار

*******************

فالح الشيباني



قالي الشيباني وأبداها .. نصيحها للي يبغاها
ذكر الله فاول مبداها .. رب من طينه كونا

والقصيدة يوم أبديها .. أبغى العالم تسمع فيها
على كيفي ومسويها .. والقصيدة ماتشحنا

وأتطرق فـ القصيدة .. عن سلبيات عديدة
عسى السامع فيها تفيده .. وإن سمع القصيدة غنا

نبغى نذكر شيء(ن) سايد .. شيء(ن) سلبي وأمره (تس)ـايد
وأشوفه في العالم زايد .. والله من شره يآمنا

الزوجة غالـ(ن) مشراها .. ياويلك ياللي تبغاها
والله إن تبطي ماتلقاها .. وتاخذلك دين وتتعنى

والمشكلة من والدها .. لا جو له ناس يطرها
عيا عنهم ثم عقدها .. يحلم له بقصور تبنا

*********************

قرعان عبدالله اليامي




أول كلامي ذكر رب المقادير
الله رب الكون عالم بالاسرار

أقولها ماهو كلام وتصاوير
الشعر نقد جنيه فضه ودينار

ماأقول أنا أحسن شاعر غيري كثير
وماأقول أنا الفايز على كل الأوار

لكن قصيدي عارف صفوة البير
والله شاهد والبشر وأهل الأنظار

وماني شاعر مبتدي توه صغير
وماني شاعر مبدع يضرب الطار

**********************

عبدالرحمن المهتلي



لا ودع إلا لنفس ودعتها ودعت نفسي معي لكن خذتها
نفسي اللي ودعت نفسي وراحت روحت هذي وهذيك لحقتها
ودعت واستودعت سر بعيني ذايعـ(ن) من سرها مااستودعتها
جادلن حطت على خدي مياسم من دموع وكل خلق الله قرتها
لو لمحها جاهلـ(ن) مافك خطه بيتهجاء حرفه اللي كاتبتها
اسمها يصعب على لساني يجيبه والحروف من العذوبة عذبتها
وكل بنت فاتنة حسن ونعومة لا مشت معها تحس بمرجلتها
وأعجب الأشياء حياتي في ممتاي لـ كتبتني في الحياة بممستحها

*********************

حجرف العصيمي




زعل مشاريه وملامه وتهديد
وشلون أبتحمل قيودك من أولك

تقسى وتهجرني من العيد للعيد
وأطفي مع غيبتك وتعود وأشعلك

وأقطفك قطف اليانع من العناقيد
وتضمى وترجع لي وأروي بلايلك

المسألة سهلة بدون أي تعقيد
خذني على كيفك وأنا يالحبيب إلك

لا صار مالك في المحبة مواعيد
سلمني إحساسك من آخرك لأولك

بح (( صوت العقل )) من طول الندى
إلمس المحسوس \ وإستخدم ذكاك..!!

(( فرصة التغيير )) لاتذهب سُدى
قبل تبدى .. خطوتين \ إرجع وراك..

طيبتك مع (( بعض خلق الله )) ردى
لاتواضع (( وأسفل العالم )) رقاك..!!


رائع هذا الشاعر

فيصل بن طوالة