شاعر من الدلم

السلام عليكم ورحمه الله وبركاته
احب ان اقدم لكم هذه القصيده لشاعر من شعراء هذيل وهو
الشاعر | عبد العزيز بن ناصر الهذيلي يرحمه الله من اهل ( الدلم)

ينصح فيها ابنه ( محمد) يقول فيها

يالله المطلوب يامــــن هو لطيف *** ياكريم الوجه يامنشــي الغمـــام
اسالك ياواحد مالـــــــه وصيف *** من تحجى في حجاجك مايضــــام
عند بابك طايح دمعــــــي ذريف *** مانصيت الا انت يامحيي العظام
خاضع متذلل حــــــــــالي نحيف *** تايب ارجو بعـــفوك الســــلام
يا(محمد )خل قلبـــــك لي عطيف *** واستمع مني نصيحــه بالتمــام
لو تشوف اللي على دربك ضعيف *** هيد السرعه ووقف لــه شمــام
وساعده واجعل جنابك له صخيف *** واصنع المعروف مع حسن الكلام
خذ نصيحه شايب قلبـــــه رهيف *** يوم تسري الليل حاربـت المنام
كود اشوفك واتبجح بـــك واريف *** واتهنى بالمنام وبالطــــــــعام
يامحمد صاحب الحـــــر العفيف *** راعي الشيمات عن درب الملام
صاحبه بالطيب واختصه وليف *** واحفظه عما يهومه او يــــــهام
احسن الاخلاق واقصد لا تحيف *** وارحم الايتام وضعيف الانـــــــام
واعرف الدنيا تــــــراها بالنكيف *** بالتقلب كل يوم وكل عــــــــــــام
واتق الله وامش بالــدرب النظيف *** واترك العيلان ودروب الهـــــيام
وعز نفسك من شريف او طريف *** لاتبين حاجتك عند اللــــــــــــئام
والردي لو تطلبه قطـــعه رغيف *** شان وجه وتغشاه الظــــــــلام
وعقب ذا صلو على الطه الشريف *** عد ماهـــلت مراويـــح الغمـــام